লোকসভা নিৰ্বাচনৰ পূৰ্বে আগ্ৰাসী ভংগীত কংগ্ৰেছ; সকলো সমন্বয়কক দিল্লীলৈ তলৱ

Congress Strategy for Lok Sabha Polls : ২০২৪ চনৰ লোকসভা নিৰ্বাচনৰ বাবে সাজু হৈছে কংগ্ৰেছ । শেহতীয়াকৈ ১১ আৰু ১২ জানুৱাৰীত নতুন দিল্লীত নিযুক্ত কৰা ৫০০ লোকসভা সমন্বয়কক নিৰ্বাচনৰ প্ৰস্তুতিৰ বিষয়ে আলোচনা কৰিবলৈ আৰু উপযুক্ত নিৰ্দেশনা জাৰি কৰিবলৈ আমন্ত্ৰণ জনাইছে ।

নিউজ ডেস্ক, ১০ জানুৱাৰী : ২০২৪ চনৰ লোকসভা নিৰ্বাচনৰ পূৰ্বে কংগ্ৰেছ আগ্ৰাসী ৰূপত অৱতীৰ্ণ হৈছে আৰু ২৮ জনীয়া ইণ্ডিয়া ব্লকৰ এংকৰ হিচাপে নিজৰ ভূমিকা পালন কৰিছে ।

কংগ্ৰেছৰ ৰণনীতিবিদসকলে ২০০৯ চনৰ লোকসভাৰ ফলাফলৰ ওপৰত ভিত্তি কৰি উত্তৰ প্ৰদেশত সমাজবাদী পাৰ্টী (এছপি) আৰু ৰাষ্ট্ৰীয় লোক দলৰ (আৰএলডি) সৈতে আসন ভাগ-বাটোৱাৰাৰ এক সমীকৰণ তৈয়াৰ কৰিবলৈ আগবাঢ়িছে । দলৰ ভিতৰুৱা সূত্ৰত এই কথা প্ৰকাশ । আনহাতে, ১২ জানুৱাৰীত আসন ভাগ-বাটোৱাৰা আলোচনাৰ সময়ত মায়াৱতীৰ বহুজন সমাজ পাৰ্টীক (বিএছপি) অন্তৰ্ভুক্ত কৰাৰ বাবেও গুৰুত্ব দিবলৈ গৈ আছে । ইফালে দলৰ মুৰব্বী মল্লিকাৰ্জুন খাৰ্গে আৰু ৰাহুল গান্ধীয়ে দলৰ লোকসভা নিৰ্বাচনৰ ৫০০ সমন্বয়কক সমগ্ৰ দেশজুৰি আগন্তুক সাধাৰণ নিৰ্বাচনৰ বাবে কেনেদৰে প্ৰস্তুতি কৰিব লাগে তাৰ নিৰ্দেশ দিবলৈ ১১ জানুৱাৰীত দিল্লীলৈ মাতি পঠিয়াইছে ।

"আমি শেহতীয়াকৈ নিযুক্ত কৰা ৫০০ লোকসভা নিৰ্বাচন সমন্বয়কক নিৰ্বাচনৰ প্ৰস্তুতিৰ বিষয়ে আলোচনা কৰিবলৈ আৰু তেওঁলোকক উপযুক্ত নিৰ্দেশনা জাৰি কৰিবলৈ ১১ আৰু ১২ জানুৱাৰীত দিল্লীলৈ আমন্ত্ৰণ জনাইছোঁ । আমি বিৰোধী মিত্ৰতাৰ বাবে সম্ভৱপৰ সকলো চেষ্টা চলাম ।" এআইচিচিৰ সাধাৰণ সম্পাদক সংগঠন কে চি বেণুগোপালে ইটিভি ভাৰতক কয় ।

কংগ্ৰেছৰ পাঁচজনীয়া ৰাষ্ট্ৰীয় মিত্ৰজোঁটৰ পেনেলে ১২ জানুৱাৰীত এছপি আৰু আৰএলডি নেতাসকলৰ সৈতে আলোচনা কৰি উত্তৰ প্ৰদেশৰ দৰে গুৰুত্বপূৰ্ণ ৰাজ্যখনৰ বাবে আসন ভাগ-বাটোৱাৰা আলোচনাক চূড়ান্ত ৰূপ দিব । দলৰ ভিতৰুৱা সূত্ৰ মতে, কংগ্ৰেছৰ ৰণনীতিবিদসকলে ২০০৯ চনৰ লোকসভা নিৰ্বাচনত দলটোৱে লাভ কৰা ২২ খন আসন দাবী কৰিছে । যিটোটো হৈছে দশকটোত উত্তৰ প্ৰদেশত কংগ্ৰেছৰ সৰ্বশ্ৰেষ্ঠ প্ৰদৰ্শন ।

এই আসনসমূহ আছিল আমেথি, ৰায়বেৰেলী, আকবৰপুৰ, বাহৰিচ, বাৰাবাঁকী, ধৌৰাহৰা, দুমাৰিয়াগঞ্জ, ফৈজাবাদ, ফাৰুখাবাদ, গোণ্ডা, কানপুৰ, লখিমপুৰ খেৰী, কুশীনগৰ, মোৰাদাবাদ, চুলতানপুৰ, শ্ৰাৱস্তী, প্ৰতাপগড়, উন্নাৱ, ঝান্সি আৰু মহাৰাজগঞ্জ ।

কংগ্ৰেছৰ নীতি নিৰ্ধাৰকসকলে এইটোও উল্লেখ কৰিছে যে ২০০৯ চনৰ নিৰ্বাচনত প্ৰায় ১২ খন সংসদীয় আসনত সবাটোকৈ পুৰণি দলটো দ্বিতীয় স্থানত আছিল আৰু সেয়েহে ২০২৪ চনতো সেইকেইখন পোৱা উচিত । উল্লেখ্য যে এছপিয়ে ২০০৯ চনত ২৩ খন লোকসভা আসন, ২০১৯ চনত ৫ খন আৰু ৰাজ্যিক বিধানসভাৰ ৪০৩ জন বিধায়কৰ ভিতৰত ১১১ খন আসন লাভ কৰিছিল । কিন্তু বৰ্তমান কংগ্ৰেছৰ ৮০ খন সংসদীয় আসনৰ ভিতৰত মাত্ৰ এখন আৰু উত্তৰ প্ৰদেশৰ ৪০৩ জনীয়া বিধানসভা আসনৰ ভিতৰত দুখন আসনতহে সদস্য আছে । তেনে ক্ষেত্ৰত কংগ্ৰেছ দলৰ এই দাবী কোনো ক্ষেত্ৰতে সামঞ্জস্যপূৰ্ণ নহয় বুলিব পাৰি ।

আনহাতে, দলৰ ভিতৰুৱা সূত্ৰই জনোৱা মতে, বিজেপিৰ সৈতে মোকাবিলা কৰিবলৈ আৰু প্ৰক্ৰিয়াটোত গুৰুত্বপূৰ্ণ দলিত ভোট লাভ কৰিবলৈ বিএছপিক বিৰোধী মিত্ৰজোঁটত অন্তৰ্ভুক্ত কৰাৰ ক্ষেত্ৰত আন এটা গুৰুত্বপূৰ্ণ বিষয় হৈছে এছপি প্ৰধান অখিলেশ যাদৱে ইণ্ডিয়া ব্লকত মায়াৱতীৰ প্ৰৱেশত ৰঙা পতাকা দেখুওৱাটো ।

"চাওক, এইটো গণতন্ত্ৰ ৰক্ষাৰ বাবে এটা নিৰ্বাচন । সেয়েহে সকলো ধৰ্মনিৰপেক্ষ শক্তিয়ে বিজেপিৰ বিৰুদ্ধে একত্ৰিত হ'ব লাগিব, সেয়া কংগ্ৰেছ, এছপি, আৰএলডি বা বিএছপিয়ে হওক বা আন কোনো সংগঠন ।" উত্তৰ প্ৰদেশৰ এআইচিচিৰ ভাৰপ্ৰাপ্ত বিষয়া অবিনাশ পাণ্ডেয়ে ইটিভি ভাৰতক কয় ।

আনহাতে, দলৰ ভিতৰুৱা সূত্ৰ মতে, যিহেতু কংগ্ৰেছ আৰু এছপিৰ ভোট বেংক একে আৰু দুয়োটা দলৰ কৰ্মীয়ে একে ক্ষেত্ৰত যুঁজ দি আহিছে, তেনে ক্ষেত্ৰত উত্তৰ প্ৰদেশত মিত্ৰতাক এক উচ্চ মাত্ৰালৈ লৈ যোৱাটো প্ৰত্যাহ্বানজনক ।

মিত্ৰজোঁটৰ নেতাসকলৰ মাজত ১২ জানুৱাৰীৰ গুৰুত্বপূৰ্ণ বৈঠকৰ ফলাফল সম্পৰ্কে আশা ব্যক্ত কৰি পাণ্ডেয়ে কয়, "আমি আশাকৰোঁ যে সকলো সমস্যা অতি সোনকালে পাৰস্পৰিকভাৱে সমাধান কৰা হ'ব ।"

উল্লেখ্য যে কংগ্ৰেছে উত্তৰ প্ৰদেশত ১১ দিন অতিবাহিত কৰিবলগা আৰু ফেব্ৰুৱাৰীত প্ৰায় ২০ টা সংসদীয় সমষ্টিৰ মাজেৰে পাৰ হ'বলগা ৰাহুল গান্ধীৰ 'ভাৰত জোড়ো ন্যায় যাত্ৰা'ৰ বাবেও প্ৰস্তুতি চলাই আছে । অৱশ্যে কংগ্ৰেছ দলৰ কৰ্ণধাৰসকলে তেওঁলোকৰ পেশী কিছু নমনীয় কৰি থকাৰ সময়তো দলটোৰ এটা অংশই বিশ্বাস কৰে যে আগন্তুক সংসদীয় নিৰ্বাচনৰ বাবে যিকোনো আসন ভাগ-বাটোৱাৰা সূত্ৰত এছপিৰ ভূমিকাই এক কাৰক হিচাপে দেখা দিব পাৰে ।

লগতে পঢ়ক :যাত্ৰাৰ পূৰ্বেই বিপাঙত ভাৰত জোড়ো ন্যায় যাত্ৰা; মণিপুৰ চৰকাৰে অনুমতি নিদিয়াৰ অভিযোগ কংগ্ৰেছৰ