নেচনেল ডেস্ক, 17 জুন: শ্বেৰ-ই-পঞ্জাৱ (Sher-e-Punjab ) মহাৰাজা ৰঞ্জিত সিঙৰ মৃত্যু বাৰ্ষিকী পালন কৰিবলৈ প্ৰতি বছৰে লাহোৰস্থিত গুৰুদ্বাৰা শ্ৰী ডেহৰা চাহিব ভ্ৰমণ কৰা শিখ তীৰ্থযাত্ৰীসকলৰ 'জাথা' (দল)এ এই বছৰ পাকিস্তান ভ্ৰমণ কৰিব নোৱাৰিব ৷ বুধবাৰে শিৰোমণি গুৰুদ্বাৰা পৰিবন্ধক সমিতিয়ে (SGPC)এ এই কথা সদৰী কৰে ৷ সমিতিখনে এক বিবৃতিযোগে কয় যে, ক'ভিড-১৯ মহামাৰীৰ বাবে পাকিস্তান চৰকাৰে 'জাথা'ৰ লাহোৰ ভ্ৰমণৰ অনুমতি প্ৰত্যাখ্যান কৰিছে ৷
শিৰোমণি গুৰুদ্বাৰা পৰিবন্ধক সমিতিৰ যাত্ৰা বিভাগে পাকিস্তান শিখ গুৰুদ্বাৰা পৰিবন্ধক সমিতিৰ (পিএছজিপিচি)ৰ সভাপতি সাতৱন্ত সিঙৰ সৈতে টেলিফোনযোগে বাৰ্তালাপ কৰিছিল ৷ উক্ত বাৰ্তালাপতে সিঙে ক'ভিডসৃষ্ট পৰিস্থিতিৰ বাবে শ্বেৰ-ই-পঞ্জাৱ মহাৰাজা ৰঞ্জিত সিঙৰ মৃত্যু বাৰ্ষিকী পালন কৰিবলৈ প্ৰতিবছৰে পাকিস্তানলৈ যোৱা ভাৰতীয় শিখসকলৰ 'জাথা'ক পাকিস্তান চৰকাৰে অনুমতি প্ৰদান কৰা নাই বুলি জানিবলৈ দিছে ৷