নেশ্যনেল ডেস্ক, ২৯ অক্টোবৰ:লোকসভা নিৰ্বাচন সমাগত । তাৰ প্ৰাকক্ষণত বিৰোধী মিত্ৰজোঁটৰ সম্ভাব্য প্ৰধানমন্ত্ৰী পদৰ প্ৰাৰ্থী ৰাহুল গান্ধী ভোটাৰৰ কাষ চাপিছে । তাৰ অংশস্বৰূপে ৰাহুল গান্ধীক দেওবাৰে কৃষকসকলৰ সৈতে দেখা গৈছে । ছত্তীশগড়ৰ ৰায়পুৰৰ সমীপৰ এখন গাঁৱত কিছুমান খেতিয়কক ধান চপোৱাত সহায় কৰা দেখা গৈছে ৰাহুল গান্ধীক । কৃষকসকলৰ কাষত থিয় দি তেওঁ ছত্তীশগড়ত কংগ্ৰেছ চৰকাৰৰ কৃষক পন্থী 'মডেল' সমগ্ৰ ভাৰতত পুনৰাবৃত্তি কৰাৰ প্ৰতিশ্ৰুতি দিয়ে ।
ৰাহুল গান্ধীয়ে লগতে নিৰ্বাচনমুখী ছত্তীশগড়ত কংগ্ৰেছ চৰকাৰৰ ৫ টা আঁচনিৰ ওপৰতো আলোকপাত কৰে । তাৰ ভিতৰত আছে ঋণ ৰেহাই আৰু ইনপুট ৰাজসাহায্য, কৃষকসকলৰ স্বাৰ্থত সৰ্বশ্ৰেষ্ঠ কাম । ৰাহুল গান্ধীয়ে এক্সৰ পোষ্টত লিখিছে যে যদি কৃষকসকল সুখী হয় তেন্তে ভাৰত সুখী হ'ব । এগৰাকী দলীয় কৰ্মীয়ে জনোৱা মতে ৰাহুল গান্ধীয়ে পুৱা ৰাজধানী ৰায়পুৰৰ সমীপৰ কাথিয়া গাঁও পৰিদৰ্শন কৰে য'ত তেওঁ কৃষক আৰু শ্ৰমিকসকলৰ সৈতে বাৰ্তালাপ কৰে আৰু ধান চপোৱাত তেওঁলোকক সহায় কৰে ।
খেতিপথাৰত কাম কৰা আৰু কৃষকৰ সৈতে বাৰ্তালাপ কৰা গান্ধীৰ ফটো কংগ্ৰেছ দলে প্ৰকাশ কৰে । ভ্ৰমণৰ পাছত গান্ধীয়ে এক্সত একেখন ফটো পোষ্ট কৰি কয় যে ছত্তীশগড়ৰ কৃষকসকলৰ বাবে কংগ্ৰেছ চৰকাৰে ৫ টা উৎকৃষ্ট কাম কৰিছে । যিয়ে কৃষকসকলক ভাৰতত আটাইতকৈ সুখী কৰি তুলিছে বুলিও তেওঁ দাবী কৰে ।