Chandrayaan-3 success : ২৩ আগষ্টৰ দিনটো দেশবাসীয়ে পালন কৰিব ৰাষ্ট্ৰীয় মহাকাশ দিৱস হিচাপে

বিদেশ ভ্ৰমণ সামৰি ভাৰতত উপস্থিত হোৱা প্ৰধানমন্ত্ৰী নৰেন্দ্ৰ মোডীয়ে ইছৰোৰ বিজ্ঞানীসকলক সম্বোধন কৰে । চন্দ্ৰযান-৩ৰ সফলতাৰ বাবে তেওঁ বিজ্ঞানীসকলক ধন্যবাদ জ্ঞাপন কৰে । চন্দ্ৰযানে সফল অৱতৰণ কৰা দিনটো ৰাষ্ট্ৰীয় মহাকাশ দিৱস হিচাপে পালন কৰা হ'ব বুলিও তেওঁ ঘোষণা কৰে ।

নেশ্যনেল ডেস্ক,২৬ আগষ্ট : দক্ষিণ আফ্ৰিকা আৰু গ্ৰীচ ভ্ৰমণ সামৰি ভাৰতত উপস্থিত প্ৰধানমন্ত্ৰী নৰেন্দ্ৰ মোডী । ভাৰতত উপস্থিত হৈয়ে প্ৰধানমন্ত্ৰীৰ গুৰুত্বপূৰ্ণ ঘোষণা । ভাৰতত ২৩ আগষ্টৰ দিনটো ৰাষ্ট্ৰীয় মহাকাশ দিৱস হিচাপে পালন কৰা হ'ব । কিয়নো এই দিনটো ভাৰতৰ মহাকাশ যাত্ৰাৰ বাবে অতি গুৰুত্বপূৰ্ণ । চন্দ্ৰযান-৩য়ে চন্দ্ৰপৃষ্ঠত সফলভাৱে অৱতৰণ কৰিবলৈ সক্ষম হৈছে । ইছৰো কেন্দ্ৰত ভাৰতীয় মহাকাশ গৱেষণা সংস্থা (ইছৰো)ৰ বিজ্ঞানীসকলৰ সৈতে বাৰ্তালাপ কৰি এই ঘোষণা কৰে প্ৰধানমন্ত্ৰীগৰাকীয়ে ।

উল্লেখ্য যে গ্ৰীচৰ পৰা পোনেপোনে প্ৰধানমন্ত্ৰীগৰাকীয়ে বেংগালুৰুত উপস্থিত হয় । তেওঁক ইছৰোৰ মুৰব্বী এছ সোমনাথে আদৰণি জনায় । তাৰ পাছতে বিজ্ঞানীসকলক সম্বোধন কৰি প্ৰধানমন্ত্ৰীগৰাকীয়ে কয় যে সমগ্ৰ দেশে বিজ্ঞানীসকলক লৈ গৌৰৱান্বিত, যি সকলে নিৰন্তৰ কঠোৰ পৰিশ্ৰম কৰিছে । প্ৰধানমন্ত্ৰীয়ে লগতে জনায় যে বিক্ৰম লেণ্ডাৰে চন্দ্ৰস্পৰ্শ কৰা বিন্দুটোক 'শিৱশক্তি' বিন্দু বুলি জনা যাব আনহাতে চন্দ্ৰযান-২ অভিযানে নিজৰ পদচিহ্ন এৰি যোৱা বিন্দুটোক ত্ৰিৰংগা বিন্দু বুলি জনা যাব ।

মহিলা বিজ্ঞানীসকলে চন্দ্ৰযান-৩ ত গুৰুত্বপূৰ্ণ ভূমিকা পালন কৰিছিল । এই 'শিৱশক্তি' বিন্দুটোৱে আগন্তুক প্ৰজন্মক মানুহৰ কল্যাণৰ বাবে বিজ্ঞান ব্যৱহাৰ কৰিবলৈ অনুপ্ৰাণিত কৰিব বুলিও তেওঁ আশা প্ৰকাশ কৰে । ইছৰো টেলিমেট্ৰি ট্ৰেকিং এণ্ড কমাণ্ড নেটৱৰ্ক মিছন কণ্ট্ৰোল কমপ্লেক্সত প্ৰধানমন্ত্ৰীগৰাকীয়ে কয় যে জনসাধাৰণৰ কল্যাণ হৈছে চৰকাৰৰ সৰ্বোচ্চ প্ৰতিশ্ৰুতি । প্ৰধানমন্ত্ৰীৰ মতে একবিংশ শতিকাত বিজ্ঞান আৰু প্ৰযুক্তিবিদ্যাৰ ক্ষেত্ৰত উৎকৃষ্টতা অৰ্জন কৰা দেশখন আগবাঢ়িব ।

ইফালে গ্ৰীচৰ পৰা পোনেপোনে বেংগালুৰুত উপস্থিত হৈ তেওঁ কয় যে চন্দ্ৰযান-৩ৰ অভিযান সফল হোৱাৰ পাছত তেওঁ বিজ্ঞানীসকলক সাক্ষাতৰ বাবে অতি আগ্ৰহী আছিল । যাৰ বাবে পোনেপোনে তেওঁ তাত উপস্থিত হৈছে । আনহাতে প্ৰধানমন্ত্ৰীগৰাকী উপস্থিত হোৱাৰ পাছতে বিজেপি কৰ্মকৰ্তা আৰু তেওঁ সমৰ্থকসকলে হাতে হাতে ত্ৰিৰংগা লৈ তেওঁ আদৰণি জনায় ।

লগতে পঢ়ক :PM Modi Athens visit : গ্ৰীচ ভ্ৰমণে দুয়োখন দেশৰ লোকৰ মাজত বৃদ্ধি কৰিব জনসংযোগ: প্ৰধানমন্ত্ৰী মোদী