নেশ্যনেল ডেস্ক, ২২ এপ্ৰিল: দিল্লীৰ চিকিৎসালয়সমূহত অক্সিজেনৰ অভাৱত হাহাকাৰ কৰিবলগীয়া হৈছে ক'ভিড ৰোগীয়ে । দিল্লীৰ কেইবাখনো ব্যক্তিগত আৰু চৰকাৰী চিকিৎসালয়ত ক'ভিড-১৯ ত আক্ৰান্ত ৰোগীৰ চিকিৎসা অক্সিজেন কম হোৱাত কেন্দ্ৰই বুধবাৰে ৰাষ্ট্ৰীয় ৰাজধানীৰ অক্সিজেন কোটা ৩৭৮ মেট্ৰিক টনৰ পৰা ৪৮০ মেট্ৰিক টনলৈ বৃদ্ধি কৰে । এই সন্দৰ্ভত মুখ্যমন্ত্ৰী অৰবিন্দ কেজৰিৱালে কেন্দ্ৰীয় চৰকাৰক ধন্যবাদ জ্ঞাপন কৰে । দিল্লী চৰকাৰে এক বিবৃতিযোগে কয় যে ওড়িশা, পশ্চিমবংগ, উত্তৰাখণ্ড, হাৰিয়ানা, উত্তৰ প্ৰদেশ আৰু হিমাচল প্ৰদেশৰ পৰা কেন্দ্ৰই দিল্লীলৈ ৪৮০ মেট্ৰিক টন অক্সিজেন যোগান ধৰিব ।
লক্ষণীয় বিষয় যে, ৪৮০ মেট্ৰিক টনৰ ওড়িশাৰ পৰা ১০০ মেট্ৰিক টন অক্সিজেন (৭০ মেট্ৰিক টন) আৰু পশ্চিমবংগৰ (৩০ মেট্ৰিক টন) দিল্লী পাবলৈ প্ৰায় ৭২ ঘণ্টা সময় লাগিব । ইফালে, হাৰিয়ানাই যোগান ধৰিবলগীয়া ১৪০ মেট্ৰিক টন অক্সিজেন বুধবাৰে নিশা প্ৰায় ৮ বজাত দিল্লীলৈ ৰাওনা হোৱা নাছিল । সোমবাৰে আৰু মঙলবাৰে, প্ৰতিদিনে ৭০০ মেট্ৰিক টনৰ প্ৰয়োজনীয়তাৰ বিপৰীতে দিল্লীলৈ প্ৰায় ২৪০ মেট্ৰিক টন আৰু ৩৬৫ মেট্ৰিক টন অক্সিজেন যোগান ধৰা হৈছিল । যিহেতু দিল্লীৰ নিজা অক্সিজেনৰ উৎস নাই গতিকে হাৰিয়ানা আৰু উত্তৰ প্ৰদেশৰ পৰা অক্সিজেন যোগান ধৰা হয় ।