নেশ্যনেল ডেস্ক, ১৮ আগষ্ট: লক্ষ্নৌ-আগ্ৰা এক্সপ্ৰেছ ঘাইপথত ভয়ংকৰ পথ দুৰ্ঘটনা সংঘটিত ৷ অসমৰ পৰা উত্তৰ প্ৰদেশৰ ফিৰোজাবাদৰ মাজেৰে দিল্লী অভিমুখে গৈ থকা এখন বাছ দুৰ্ঘটনাত পতিত হৈছে । বাছখনে ঘাইপথটোৰ সমীপৰ এটা খুঁটাত খুন্দিওৱাৰ ফলত এই দুৰ্ঘটনা সংঘটিত হয় ৷
দুৰ্ঘটনাটোত দুজন লোক থিতাতে নিহত হোৱাৰ উপৰিও প্ৰায় ২০ গৰাকীৰো অধিক যাত্ৰী আহত হয় । আহতসকলৰ ১৮ গৰাকীক ততালিকে শিকোহাবাদৰ স্থানীয় চিকিৎসালয়ত ভৰ্তি কৰোৱা হয় । ইয়াৰে একাংশ লোকক চিকিৎসাৰ বাবে চৈফাইস্থিত চিকিৎসালয়ত ভৰ্তি কৰোৱা হৈছে ।
দিল্লী অভিমুখী অসমৰ যাত্ৰীবাহী বাছ দুৰ্ঘটনাত পতিত চালকগৰাকীৰ টোপনি অহাৰ বাবে দুৰ্ঘটনাটো সংঘটিত হোৱাৰ আশংকা কৰা হৈছে । তথ্য অনুসৰি, বাছখনত প্ৰায় ৫০ গৰাকী যাত্ৰীয়ে দিল্লীলৈ কামৰ সন্ধানত গৈ আছিল ৷ আহতসকলৰ অধিকাংশই শ্ৰমিক ৷
বুধবাৰে পুৱা প্ৰায় ৪ মান বজাত ফিৰোজাবাদৰ নাছিৰপুৰ আৰক্ষী থানা এলেকাত সংঘটিত হয় এই দুৰ্ঘটনাটো । দুৰ্ঘটনাৰ পাছতে একাংশ যাত্ৰীয়ে আৰক্ষী আৰু UPDA ক দুৰ্ঘটনাৰ বিষয়ে অৱগত কৰে । লগে লগে সেই স্থানত আৰক্ষী আৰু ইউপিডিএ-ৰ উদ্ধাৰকাৰী দল উপস্থিত হৈ আহতসকলক উদ্ধাৰ কৰে ।
ইফালে, ডাঃ শিৱ কুমাৰ কাৰ্দামে জনোৱা মতে, ১৭ গৰাকী আহতক চিকিৎসাৰ বাবে অনা হৈছিল ৷ যাৰ ভিতৰত পাঁচগৰাকীৰ দেহৰ বিভিন্ন অংশৰ হাড় ভাঙিছে । সংকটজনক অৱস্থাত থকা যাত্ৰীসকলক জিলা চিকিৎসালয়লৈ প্ৰেৰণ কৰা হৈছে ।
নাছিৰপুৰ আৰক্ষীয়ে জনোৱা মতে, দুৰ্ঘটনাটোৰ বিষয়ে খবৰ লাভ কৰা মাত্ৰকে আৰক্ষী ঘটনাস্থলীত উপস্থিত হৈছে । ইতিমধ্যে দুৰ্ঘটনাগ্ৰস্ত বাছখন আঁতৰোৱা হৈছে আৰু যান-বাহন চলাচলৰ বাবে পথটো মুকলি কৰা হৈছে । ঘটনা সন্দৰ্ভত ইতিমধ্যে আৰক্ষীয়ে তদন্ত আৰম্ভ কৰিছে ।
লগতে পঢ়ক :প্ৰধানমন্ত্ৰী মোডীৰ নামত মন্দিৰ নিৰ্মাণ
