নিউজ ডেস্ক, 17 ডিচেম্বৰ :দেওবাৰে মহাৰাষ্ট্ৰৰ নাগপুৰ জিলাৰ বজাৰগাঁও গাঁওস্থিত সৌৰ বিস্ফোৰক সামগ্ৰী নিৰ্মাণকাৰী কোম্পানীৰ প্ৰকল্পত বিস্ফোৰণৰ ঘটনা ৷ সৌৰ বিস্ফোৰক কোম্পানীৰ কাষ্ট বুষ্টাৰ প্ৰকল্পত পেকিং কৰাৰ সময়ত এই বিস্ফোৰণটো সংঘটিত হৈছে । এই ঘটনাত 9 জন লোকৰ মৃত্যু হোৱা বুলি সন্দেহ কৰা হৈছে ৷ ইফালে মৃতকৰ সংখ্যা বৃদ্ধি পোৱাৰ সম্ভাৱনা আছে ৷
আৰক্ষীয়ে জনোৱা অনুসৰি, পুৱা ৯ বজাত বজাৰগাঁও অঞ্চলৰ সৌৰ উদ্যোগৰ এটা কাষ্ট বুষ্টাৰ গোটত এই বিস্ফোৰণ সংঘটিত হয় ।
এই বিস্ফোৰণত নিহতসকল হৈছে ক্ৰমে যুৱৰাজ কিষাণজী ঘাৰোডে, ওমেশ্বৰ কিষাণলাল মাচ্চিৰ্কে, মিতা প্ৰমোদ উইকে, আৰতি নীলাকান্ত চাহৰে, শ্বেতালী দামোদৰ মাৰ্বাটে, পুষ্পা শ্ৰীৰামজী মন্পুৰে, ভাগ্যশ্ৰী সুধাকৰ লোটানে, ৰুমিতা বিলাস, উইকে আৰু মচম ৰাজকুমাৰ পাটলে। মৃতসকলৰ ভিতৰত ২ জন ৱাৰ্ধাৰ, এজন চন্দ্ৰপুৰৰ, এজন অমৰাৱতীৰ আৰু পাঁচজন লোক নাগপুৰৰ বাসিন্দা আছিল বুলি জানিব পৰা গৈছে ৷