নেশ্যনেল ডেস্ক, ১৬ জুন : সমগ্ৰ দেশত কৰ'ণাৰ সংক্ৰমণ অব্যাহত থকাৰ বাবে ৰাজনৈতিক সভা বা ৰাজনৈতিক কাৰ্যকলাপ একপ্ৰকাৰ স্তব্ধ হৈ আছে । তেনে সময়তে দুদিনীয়া ভ্ৰমণসূচীৰে ত্ৰিপুৰাত উপস্থিত বিজেপিৰ ৰাষ্ট্ৰীয় সাধাৰণ সম্পাদক বি এল সন্তোষ । বুধবাৰে নেতাগৰাকী উপস্থিত হোৱাৰ লগে লগে এতিয়া ত্ৰিপুৰা ৰাজনৈতিক পৰিৱৰ্তনৰ উমান পোৱা গৈছে । অৱশ্যে কি উদ্দেশ্যে নেতাগৰাকী ত্ৰিপুৰালৈ আহিছে ৰাজ্যিক নেতৃত্বই গোপনে ৰখা চেষ্টা কৰিছে ।
সন্তোষৰ নেতৃত্বত জ্যেষ্ঠ নেতাসকলৰ দলটোত বিজেপিৰ ৰাষ্ট্ৰীয় সম্পাদক অজয় জামৱাল আৰু অসমৰ সাংগঠিনক সম্পাদক ফনীন্দ্ৰনাথ শৰ্মাও অন্তৰ্ভুক্ত আছিল। জানিব পৰা মতে বি এল সন্তোষে প্ৰথমে ৰাজ্যিক মুখ্য কাৰ্যালয়ত বিজেপি দলৰ কাৰ্য্যালয়ৰ বিষয়াসকলৰ সৈতে এক গুৰুত্বপূৰ্ণ বৈঠকত মিলিত হয় । বৈঠকৰ অন্তত সকলো বিধায়ক, সাংসদ, উপ-মুখ্যমন্ত্ৰী আৰু চাৰিগৰাকী মন্ত্ৰীক মত-বিনিময়ৰ বাবে সন্তোষক ব্যক্তিগতভাৱে সাক্ষাৎ কৰিবলৈ আমন্ত্ৰণ জনোৱা হয় ।
ব্যক্তিগত বৈঠকৰ পিছত, সকলো বিধায়কৰ উপস্থিতিত আন এক বিশেষ পৰ্যায়ৰ বৈঠক বিজেপিৰ মুখ্য কাৰ্যালয়ত অনুষ্ঠিত হ'ব । সন্ধিয়া আইপিএফটি (IPFT)ৰ বিধায়কসকলকো মুখ্যমন্ত্ৰী বিপ্লব কুমাৰ দেৱ (Biplab Deb)ৰ বাসগৃহত এখন বৈঠকৰ বাবে আমন্ত্ৰণ জনোৱা হৈছে যাৰ পিছত জ্যেষ্ঠ নেতাজনে মুখ্যমন্ত্ৰী বিপ্লব কুমাৰ দেৱ Biplab Deb)ৰ সৈতে আলোচনাত বহিব ।