নেশ্যনেল ডেস্ক,৬ এপ্ৰিল :ভাৰতীয় জনতা পাৰ্টিয়ে প্ৰতিষ্ঠা দিৱস (Foundation Day of Bharatiya Janata Party) উপলক্ষ্যে দেশজুৰি বিভিন্ন ধৰণৰ কাৰ্যসূচী ৰূপায়ণ কৰিছে । অহা ৭ এপ্ৰিলৰ পৰা ২০ এপ্ৰিললৈ দেশৰ ভিন্ন প্ৰান্তত বিজেপি দলে বহুতো কাৰ্যসূচী ৰূপায়ণ কৰিব । বুধবাৰে প্ৰতিষ্ঠা দিৱসৰ লগত সংগতি ৰাখি প্ৰধানমন্ত্ৰী নৰেন্দ্ৰ মোডীয়ে দলীয় নেতা-কৰ্মীসকলক সম্বোধন কৰিব (PM Modi to address party leaders and workers)।
বিজেপিৰ মুখ্য কাৰ্যালয়ত সংবাদমেল সম্বোধন কৰি সাধাৰণ সম্পাদক অৰুণ সিঙে এই কথা প্ৰকাশ কৰে । উক্ত দিন কেইটাত আয়োজিত বিভিন্ন কাৰ্যসূচীৰ জৰিয়তে দলীয় কৰ্মীসকলে মোডী চৰকাৰৰ জনকল্যাণমূলক আঁচনিৰ বিষয়ে ৰাইজৰ মাজক সজাগতা সৃষ্টি কৰিব । ইফালে ১৪ এপ্ৰিলত বি আৰ আম্বেদকাৰৰ জন্ম জয়ন্তী (Birth anniversary of B R Ambedkar) উপলক্ষ্যে বিভিন্ন কাৰ্যসূচীও আয়োজন কৰিব দলটোৱে ।
বিজেপিৰ সভাপতি জে পি নাড্ডাই দলৰ মুখ্য কাৰ্যালয়ত পতাকা উত্তোলন কৰিব আৰু ড৹ শ্যামা প্ৰসাদ মুখাৰ্জী আৰু পণ্ডিত দীনদয়াল উপাধ্যায়ৰ প্ৰতিমূৰ্তিত মাল্যাৰ্পন কৰিব । দলটোৱে মুখ্য কাৰ্যালয়ত এক ৰক্তদান শিবিৰৰো আয়োজন কৰিব । প্ৰধানমন্ত্ৰী মোডীয়ে ভিডিঅ' কনফাৰেন্সৰ জৰিয়তে পুৱা ১০ বজাত সমগ্ৰ দেশৰ দলীয় কৰ্মীসকলক সম্বোধন কৰিব ।