নেশ্যনেল ডেস্ক, ১৪ নৱেম্বৰ :বিটকইন কেলেংকাৰীয়ে (Bitcoin scam) সম্প্ৰতি কৰ্ণাটকৰ ৰাজনীতিত তীব্ৰ প্ৰতিক্ৰিয়াৰ সৃষ্টি কৰিছে । শাসকীয় বিজেপিৰ বিৰুদ্ধে কেলেংকাৰী সন্দৰ্ভত তদন্তত গাফিলতিৰ অভিযোগ তুলিছে বিৰোধী কংগ্ৰেছে । এনে অভিযোগৰ মাজতে মুখ্যমন্ত্ৰী বাসবৰাজ বোম্মাই (Basavaraj Bommai) প্ৰধানমন্ত্ৰী নৰেন্দ্ৰ মোডীক সাক্ষাৎ কৰে ।
এআইচিচিৰ (AICC) মুখপাত্ৰ ৰণদীপ সিং সুৰজেৱালাই কেলেংকাৰীটোৰ ন্যায়িক তদন্তৰ দাবী জনায় । উল্লেখ্য যে, 'হোৱেল এলাৰ্ট' (Whale Alert) অনুসৰি ২০২০ চনৰ ১ ডিচেম্বৰ আৰু ২০২১ চনৰ ১৪ এপ্ৰিল তাৰিখে বিটফাইনেক্স বিটকইন এক্সচেঞ্জৰ (Bitfinex Bitcoin exchange) ২০১৬ চনৰ হেকৰ পৰা বিটকইন স্থানান্তৰ কৰা হৈছিল । ইয়াৰ মূল্য প্ৰায় ৭০৪.৮ নিযুত আমেৰিকান ডলাৰ । ভাৰতীয় মূল্য হিচাপত ইয়াৰ পৰিমাণ ৫,২৪০ কোটি টকা হ'ব ।
লক্ষণীয়ভাৱে, কংগ্ৰেছৰ বিধায়ক তথা চৰকাৰী মুখপাত্ৰ প্ৰিয়াংক খাৰ্গে হেকাৰ শ্ৰীকৃষ্ণৰ এক বিবৃতি প্ৰকাশ কৰি কয় যে যদি তদন্তটো নিৰপেক্ষভাৱে কৰা হয় তেন্তে চৰকাৰৰ পতন নিশ্চিত । তেওঁৰ অভিযোগ কেলেংকাৰীটোত বিজেপি নেতা আৰু তেওঁলোকৰ সন্তান জড়িত আছিল । আনকি গোচৰটো এনফৰ্চমেণ্ট ডিৰেক্টৰেটলৈ (ED) হস্তান্তৰ কৰা সন্দৰ্ভত চৰকাৰৰ নিৰ্দেশৰ ওপৰতো প্ৰশ্ন তোলে নেতাগৰাকীয়ে ।