আগৰতলা, ২৮ ছেপ্টেম্বৰ : বুধবাৰে নতুন দিল্লীত ত্ৰিপুৰাৰ একমাত্ৰ ৰাজ্যসভাৰ সাংসদ হিচাপে শপত গ্ৰহণ কৰে প্ৰাক্তন মুখ্যমন্ত্ৰী বিপ্লৱ কুমাৰ দেৱে (Biplab Kumar Deb took oath as Rajya Sabha MP) ।
শপত গ্ৰহণৰ পিছতে বিপ্লৱ দেৱে তেওঁৰ টুইটাৰত লিখিছে (Former Tripura CM Biplab Kumar Deb), "মাতা ত্ৰিপুৰাসুন্দৰীৰ আশীৰ্বাদত ৰাজ্যসভাৰ সাংসদ হিচাপে শপত গ্ৰহণ কৰি সন্মানিত হ’লো । প্ৰধানমন্ত্ৰী নৰেন্দ্ৰ মোদীজী, বিজেপি সভাপতি জেপি নাড্ডাজী, গৃহ মন্ত্ৰী অমিত শ্বাহজী আৰু জ্যেষ্ঠ নেতৃত্বক মোৰ ৰাজ্যখনক প্ৰতিনিধিত্ব কৰাৰ সুযোগ দিয়াৰ বাবে কৃতজ্ঞতা জ্ঞাপন কৰিছোঁ" ৷
তেওঁ লগতে লিখিছে, "সকলোৰে সমৰ্থন আৰু সামূহিক প্ৰচেষ্টাৰ সৈতে মই ত্ৰিপুৰাৰ কল্যাণ আৰু উন্নয়নৰ বাবে আন্তৰিকতাৰে কাম কৰিম ।"
উল্লেখ্য যে, উপ-ৰাষ্ট্ৰপতি তথা ৰাজ্যসভাৰ অধ্যক্ষ জগদীপ ধনখড়ে (Rajya Sabha Chairman Jagdeep Dhankhar) আজি তেওঁৰ কাৰ্যালয়ত ৰাজ্যসভালৈ নৱনিৰ্বাচিত সদস্য বিপ্লৱ কুমাৰ দেৱ আৰু ৰাজ্যসভালৈ মনোনীত সদস্য গোলাম আলীক শপত বাক্য পাঠ কৰায় ।
উল্লেখ্য, ত্ৰিপুৰাৰ মুখ্যমন্ত্ৰী হিচাপে কাৰ্যনিৰ্বাহ কৰি থকা ডাঃ মাণিক সাহাৰ (Tripura CM Dr Manik Saha) পদত্যাগৰ ফলত খালী হোৱা ৰাজ্যসভাৰ আসনখনৰ পদ পূৰণৰ বাবে ত্ৰিপুৰাত উপ-নিৰ্বাচন অনুষ্ঠিত হয় । উক্ত উপ-নিৰ্বাচনত বিপ্লৱ কুমাৰ দেৱ নিৰ্বাচিত হয় । বৈদেশিক পৰিক্ৰমা মন্ত্ৰালয় আৰু সংসদীয় পৰিক্ৰমা মন্ত্ৰালয়ৰ ৰাজ্যিক মন্ত্ৰী ভি মূৰলীধৰণ; বিজ্ঞান আৰু প্ৰযুক্তি মন্ত্ৰালয় আৰু পৃথিৱী বিজ্ঞান মন্ত্ৰালয়ৰ ৰাজ্যিক মন্ত্ৰী ডঃ জিতেন্দ্ৰ সিং, ৰাজ্যসভাৰ উপাধ্যক্ষ হৰিবংশ; ৰাজ্যসভাৰ মহাসচিব পি চি মোদী আৰু ৰাজ্যসভা সচিবালয়ৰ অন্যান্য জ্যেষ্ঠ বিষয়াসকল অনুষ্ঠানটোত উপস্থিত থাকে ।
উল্লেখ্য, ইয়াৰ পূৰ্বে ২২ ছেপ্টেম্বৰত আগৰতলা চহৰৰ ত্ৰিপুৰা বিধানসভাত ত্ৰিপুৰাৰ একমাত্ৰ ৰাজ্যসভা আসনখনৰ বাবে উপ-নিৰ্বাচন অনুষ্ঠিত হৈছিল । ত্ৰিপুৰা বিধানসভা চৌহদত পুৱা ৯ বজাত ভোটদান প্ৰক্ৰিয়া আৰম্ভ হয় আৰু আবেলি ৪ বজালৈকে চলে ।
ত্ৰিপুৰাৰ ৰাজ্যসভা নিৰ্বাচনৰ ৰিটাৰ্ণিং বিষয়াৰ সূত্ৰ অনুযায়ী, ক্ষমতাসীন বিজেপিৰ প্ৰাক্তন মুখ্যমন্ত্ৰী বিপ্লৱ কুমাৰ দেৱ আৰু বিৰোধী চিপিআইএমৰ ভানুলাল সাহাকে ধৰি দুজন প্ৰাৰ্থীয়ে উক্ত নিৰ্বাচনত প্ৰতিদ্বন্দিতা কৰে ।
লগতে পঢ়ক :ত্ৰিপুৰাত চাহ নিলাম কেন্দ্ৰ স্থাপনৰ সম্ভাৱনীয়তা সম্পৰ্কে আলোচনা-চক্ৰ
