নিউজ ডেস্ক, ৭ অক্টোবৰ:বিহাৰৰ পশ্চিম চাম্পাৰণ জিলাত ত্ৰাসৰ সৃষ্টি কৰিছে এটা বাঘে (Champaran district of Bihar) ৷ বিগত দুদিনত বাঘটোৰ আক্ৰমণত দুজনকৈ লোকৰ মৃত্যু হোৱাৰ লগতে দুমাহত মৃত্যু হৈছে ৭জনকৈ লোকৰ ৷ বিহাৰৰ বাগাহান টাইগাৰ ৰিজাৰ্ভৰ নৰখাদক বাঘটোৱে বনাঞ্চলৰ ভিতৰৰ লগতে ইয়াৰ আশে-পাশে থকা কেইবাখনো গাঁৱত ত্ৰাসৰ সৃষ্টি কৰি আহিছে(Maneater Tiger In Bihar) ৷ নৰখাদক বাঘটোৰ উপদ্ৰৱত অতিষ্ঠ হৈ অৱশেষত শ্বুট এট ছাইটৰ নিৰ্দেশ দিছে বন বিভাগে (Order to Shoot Tiger) ৷
নৰখাদকটোৰ সন্ত্ৰাসত বন বিভাগৰ লোকৰ লগতে গাঁওকেইখনৰ বাসিন্দাই বিনিদ্ৰ নিশা কটাবলগীয়া হৈছে ৷ বৃহস্পতিবাৰে নিশা বাঘটোৱে জিলাখনৰ বগাহা নগৰৰ হৰহিয়া সৰেহ অঞ্চলৰ সঞ্জয় মাহাতো(৩৫) নামৰ এজন লোকক লৈ যায় । নিশা পথাৰলৈ যোৱাৰ সময়তে নৰখাদকটোৱে সঞ্জয় মাহাতোক লক্ষ্য কৰি লৈছিল বুলি বন বিভাগৰ বিষয়াসকলে সন্দেহ ব্যক্ত কৰে ৷
ইয়াৰ পূৰ্বে বুধবাৰে নিশা নৰখাদকটোৱে জিলাখনৰ সিংহী গাঁৱত ঘৰত প্ৰৱেশ কৰি এগৰাকী নাবালিকাক(১২) কোঠাৰ পৰা লৈ যায় । পৰিয়ালৰ লোকে জনোৱা মতে, সেই সময়ত নাবালিকাগৰাকী কোঠালিত শুই আছিল ৷ পৰিয়ালৰ লোকে ঘটনাৰ সম্ভেদ লাভ কৰি হুলস্থুল কৰাত নৰখাদকটোৱে নাবালিকাগৰাকীৰ এৰি পলায়ন কৰে ৷