নেশ্যনেল ডেস্ক,৫ জুন :বিহাৰত নিৰ্মীয়মান দলং ভাগি পৰাৰ পাছতে বিভিন্ন মহলত বিতৰ্ক আৰম্ভ হৈছে । চৰকাৰক বিৰোধী বিজেপিয়ে সমালোচনা কৰাৰ সমান্তৰালকৈ উপ-মুখ্যমন্ত্ৰী তথা পথ নিৰ্মাণ মন্ত্ৰী তেজস্বী যাদৱে ঘটনাটোৰ উচ্চ পৰ্যায়ৰ তদন্তৰ নিৰ্দেশ দিছে (High level inquiry on Bihar Bridge collapse)। লগতে, সোমবাৰে এক উচ্চ পৰ্যায়ৰ বৈঠকো আহ্বান কৰিছে । নিৰ্মাণ কাৰ্যৰ সৈতে জড়িত প্ৰতিষ্ঠানটোৰ বিভাগীয় বিষয়া, অভিযন্তা আৰু অন্যান্য কৰ্মচাৰীসকলকো মাতি অনা হৈছে ।
দেওবাৰে সন্ধিয়া তেজস্বী যাদৱে দলংখন খহি পৰাৰ পাছতে পথ নিৰ্মাণ বিভাগৰ আণ্ডাৰ চেক্ৰেটেৰী প্ৰত্যয় অমৃতৰ সৈতে এখন সংবাদমেল সম্বোধন কৰে । য'ত তেওঁ স্পষ্ট কৰি দিয়ে যে গোচৰটোত দোষী সাব্যস্ত হোৱা সকলৰ বিৰুদ্ধে কঠোৰ ব্যৱস্থা লোৱা হ'ব (Tejashwi Yadav on Bihar Bridge collapse)।
তেজস্বী যাদৱে উল্লেখ কৰা মতে একেখন দলঙে পূৰ্বে বতাহৰ ফলত ক্ষতিগ্ৰস্ত হৈছিল । সেই সময়ত তেওঁলোক বিৰোধী দলত আছিল আৰু ইয়াৰ বিষয়ে মাত মাতিছিল । কিন্তু তেওঁলোকৰ চৰকাৰ গঠন হোৱাৰ পাছতে আই.আই.টি. ৰুঢ়কীৰ এটা দলে তদন্ত কৰিছিল । তদন্তৰ সময়ত দলংখনৰ ৫ নম্বৰ খুঁটা দুৰ্বল বুলি কোৱা হৈছিল (Bridge collapse in Bihar)। তেওঁ উল্লেখ কৰা মতে ইতিমধ্যে দলংখন ধ্বংস হোৱা বিষয়টো বিভাগীয় কৰ্তৃপক্ষক অৱগত কৰা হৈছে । এই ক্ষেত্ৰত চৰকাৰে কোনো ধৰণৰ আপোচ নকৰে বুলিও তেওঁ দাবী কৰিছে ।