Chhattisgarh Polls: ভূপেশ বাঘেলে ধৰ্মান্তৰকৰণৰ বজাৰ খুলিছে: হিমন্ত বিশ্ব শৰ্মা

ছত্তীশগড়ৰ মুখ্যমন্ত্ৰীৰ বিৰুদ্ধে গুৰুতৰ অভিযোগ তুলিছে অসমৰ মুখ্যমন্ত্ৰীয়ে ৷ এখন নিৰ্বাচনী সভাত অংশ লৈ ভূপেশ বাঘেলে ধৰ্মান্তকৰণৰ বজাৰ খোলা বুলি অভিযোগ তোলে ড৹ শৰ্মাই ৷

নিউজ ডেস্ক, 26 অক্টোবৰ: পাঁচ ৰাজ্যৰ বিধানসভা নিৰ্বাচনত বিজেপিৰ হৈ ব্য়াপক প্ৰচাৰত ব্যস্ত অসমৰ মুখ্যমন্ত্ৰী ড৹ হিমন্ত বিশ্ব শৰ্মা ৷ সঘনে মধ্যপ্ৰদেশ, ছত্তীশগড়, ৰাজস্থানত গেৰুৱা দলটোৰ প্ৰচাৰ চলোৱা দেখা গৈছে অসমৰ মুখ্যমন্ত্ৰীগৰাকীক ৷ কংগ্ৰেছ শাসিত ছত্তীশগড় আৰু ৰাজস্থানৰ লগতে মধ্যপ্ৰদেশতো বিৰোধী কংগ্ৰেছক তীব্ৰ আক্ৰমণ কৰা দেখা গৈছে ড৹ শৰ্মাক ৷

নিৰ্বাচনী ভাষণত স্বভাৱসুলভভাৱেই মুছলমানক লক্ষ্য কৰি লোৱা দেখা গৈছে হিমন্ত বিশ্ব শৰ্মাই ৷ কেইদিনমান পূৰ্বে ছত্তীশগড়ৰ এখন নিৰ্বাচনী সভাত হিমন্ত বিশ্ব শৰ্মাই মন্তব্য কৰিছিল যে কংগ্ৰেছে বাবৰ আৰু আকবৰক লালন-পালন কৰিছিল ৷ দেশে নৰেন্দ্ৰ মোদীক বিচাৰে, কোনো আকবৰক নিবিচাৰে ৷ এইবাৰ বৃহস্পতিবাৰে পুনৰ ছত্তীশগড়ত ৰাজ্যখনৰ মুখ্যমন্ত্ৰী ভূপেশ বাঘেলক আক্ৰমণৰ লক্ষ্য কৰি ল’লে অসমৰ মুখ্যমন্ত্ৰীগৰাকীয়ে ৷

ভূপেশ বাঘেলে সনাতম ধৰ্মক দুৰ্বল কৰিবৰ বাবে ধৰ্মান্তৰকৰণৰ এখন ডাঙৰ বজাৰ খোলা বুলি গুৰুতৰ অভিযোগ তোলে ড৹ হিমন্ত বিশ্ব শৰ্মাই ৷ মহাসমুন্দ বিধানসভা সমষ্টিত অনুষ্ঠিত এক নিৰ্বাচনী সভাত মহাসমুন্দ, খল্লাৰী, বসনা আৰু সৰায়পালীৰ বিজেপি প্ৰাৰ্থীৰ নাম ঘোষণা কৰাৰ সময়ত উপস্থিত থাকে ড৹ শৰ্মা ৷ সভাত নিজৰ ভাষণত ছত্তীশগড়ৰ ভোটাৰক বিজেপিক জয়যুক্ত কৰি ডবল ইঞ্জিনৰ চৰকাৰ গঠনৰ সুবিধা প্ৰদানৰ বাবে আহ্বান জনায় ৷

নিজৰ ভাষণত ড৹ শৰ্মাই ৰাজ্যখনৰ শাসনাধিস্থিত কংগ্ৰেছ চৰকাৰক কঠোৰ সমালোচনা কৰা দেখা যায় ৷ তেওঁ প্ৰশ্ন কৰে যে ছত্তীশগড়ত কংগ্ৰেছ চৰকাৰে বিগত পাঁচ বছৰে কি কৰিলে ? মুখ্যমন্ত্ৰী ভূপেশ বাঘেলৰ বিৰুদ্ধে গুৰুতৰ অভিযোগ তুলি ড৹ শৰ্মাই কয় যে পাঁচ বছৰে ছত্তীশগড়ত এখনো বিশ্ববিদ্যালয় স্থাপন কৰা নাই বাঘেল চৰকাৰে ৷ কিন্তু অসমত জিলাই জিলাই চিকিৎসা মহাবিদ্যালয় স্থাপন কৰা হৈছে ৷

‘‘ভূপেশ বাঘেলে ছত্তীশগড়ত বিকাশৰ বাবে কোনো কাম কৰা নাই ৷ বৰঞ্চ তেওঁ সনাতন ধৰ্মক দুৰ্বল কৰিবৰ বাবে ধৰ্মান্তৰকৰণৰ এখন ডাঙৰ বজাৰ খুলিলে ৷’’ ড৹ শৰ্মাই কয় ৷

কংগ্ৰেছৰ প্ৰাক্তন সভাপতি তথা বৰ্তমানৰ সাংসদ ৰাহুল গান্ধীক সমালোচনা কৰি হিমন্ত বিশ্ব শৰ্মাই কয় যে কংগ্ৰেছৰ নেতাসকলে সদায় বাবৰক ভক্তি তথা পূজা কৰে ৷ কংগ্ৰেছে কেতিয়াও ৰাম মন্দিৰ নিৰ্মাণৰ চেষ্টা নকৰিলে ৷ প্ৰধানমন্ত্ৰী নৰেন্দ্ৰ মোদীয়েহে মন্দিৰ নিৰ্মাণৰ কাম আৰম্ভ কৰিলে ৷ ৰাহুল গান্ধী সকলো মন্দিৰলৈ যায় কিন্তু ৰাম মন্দিৰলৈ নাযায় ৷

হিমন্ত বিশ্ব শৰ্মাই লগতে কয় যে ছত্তীশগড় চৰকাৰে যোৱা নিৰ্বাচনৰ পূৰ্বে কৃষকক কৰ মাফ কৰি দিয়াৰ প্ৰতিশ্ৰুতি দিছিল ৷ কিন্তু সেই প্ৰতিশ্ৰুতি পূৰণ নকৰিলে ৷ বৰ্তমান পুনৰ এবাৰ মিছা প্ৰতিশ্ৰুতিৰে কৃষকৰ সৈতে প্ৰবঞ্চনা কৰিছে ৷ ড৹ শৰ্মাই লগতে কয় যে ছত্তীশগড়ত নিয়োগৰ কোনো সুবিধা নাই ৷ ইয়াৰ যুৱকৰ হাতত কাম নথকাৰ বাবে কৃষকে ঋণ ল’বলৈ বাধ্য হৈছে ৷

লগতে পঢ়ক:Rahul Talks to Satyapal Malik : সত্যপাল মালিকৰ সৈতে বাৰ্তালাপত মিলিত কংগ্ৰেছ নেতা ৰাহুল গান্ধী