'বাবা কা ধাবা'ৰ স্বত্বাধিকাৰীক প্ৰতাৰণা কৰাৰ কথা অস্বীকাৰ গৌৰৱ ৱাছনৰ

এটা নিশাৰ ভিতৰতে চৰ্চা লাভ কৰা 'বাবা কা ধাবা'ৰ স্বত্বাধিকাৰী কান্তা প্ৰসাদে উত্থাপন কৰা অভিযোগক নস্যাৎ কৰিলে ইউ টিউব ব্লগাৰ গৌৰৱ ৱাছনে। বৰঙণিৰ ধন অপব্যৱহাৰ কৰি প্ৰতাৰণা কৰা বুলি অভিযোগ উত্থাপন কৰিছিল 'বাবা কা ধাবা'ৰ স্বত্বাধিকাৰী কান্তা প্ৰসাদে। এক ভিডিঅ'ৰ জৰিয়তে গৌৰৱে কান্তা প্ৰসাদৰ দুৰ্দশাৰ কথা বিৱৰি ছ'ছিয়েল মিডিয়াত শ্বেয়াৰ কৰিছিল। দুৰ্ভগীয়া স্বত্বাধিকাৰীগৰাকীলৈ দান-বৰঙণি আগবঢ়াইছিল সুহৃয়বান লোকে।

নেশ্যনেল ডেস্ক, ২ নৱেম্বৰ: ইউ টিউব ব্লগাৰ গৌৰৱ ৱাছনে অস্বীকাৰ কৰিলে দক্ষিণ দিল্লীস্থিত ভোজনালয় 'বাবা কা ধাবা'ৰ স্বত্বাধিকাৰী কান্তা প্ৰসাদৰ প্ৰতাৰণাৰ অভিযোগ। দান-বৰঙণিৰ নামত মানুহৰ পৰা ধন সংগ্ৰহ কৰিবলৈ কান্তা প্ৰসাদৰ দুৰ্দশাৰ কাহিনীৰে পৰিপুষ্ট ভিডিঅ' গৌৰৱ ৱাছনে ব্যৱহাৰ কৰাৰ অভিযোগ উত্থাপন কৰিছিল 'বাবা কা ধাবা'ৰ স্বত্বাধিকাৰীগৰাকীয়ে। সোমবাৰে কান্তা প্ৰসাদৰ এই অভিযোগক নস্যাৎ কৰে গৌৰৱে।

৮০ বছৰীয়া স্বত্বাধিকাৰীগৰাকীয়ে গৌৰৱৰ ওপৰত অভিযোগ তুলিছিল যে, বেংকৰ একাউণ্টত দান-বৰঙণিৰ ধন জমা দিওঁতে গৌৰৱে খেলিমেলি কৰিছিল। দেওবাৰে মালবীয় নগৰ আৰক্ষী থানাত গৌৰৱ ৱাচন আৰু তেওঁৰ সহযোগীৰ বিৰদ্ধে প্ৰতাৰণা, দুষ্টামি, বিশ্বাসঘাটকতা, ষড়ষন্ত্ৰ কৰা আৰু ধনৰ অপব্যৱহাৰৰ অভিযোগ তুলি গোচৰ ৰুজু কৰে। অৱশ্যে ৱাছনে এই কথা একেমুখে অস্বীকাৰ কৰিছে।

তেওঁ কয় যে, 'মোৰ ওপৰত উত্থাপন হোৱা সকলো অভিযোগ ভিত্তিহীন আৰু মিছা। ধাবাখনৰ নামত আমি লাভ কৰা সকলো ধন কান্তা প্ৰসাদক দিয়া হৈছে। মুঠ ২,৩৩,০০০ টকাৰ চেক, ১ লাখ টকা এন ই এফ টি আৰু ৪৫,০০০টকা পে টি এমৰ জৰিয়তে লাভ কৰিছে।'লগতে তেওঁ কয় যে, কান্তা প্ৰসাদে দাবী কৰিছে যে, গৌৰৱৰ হাতত বৰঙণিৰ ২৫ লাখ টকা আছিল। এই কথা মিছা বুলি মন্তব্য কৰিছে গৌৰৱে।

আন কোনো লোকে তেওঁক প্ৰৰোচিত কৰিছে বুলি সন্দেহ প্ৰকাশ কৰিছে ইউ টিউব ব্লগাৰগৰাকীয়ে। ৭ অক্টোবৰত ভিডিঅ' আপলোড কৰিছিল গৌৰৱে। প্ৰথম অৱস্থাত 'বাবা কা ধাবা'ৰ স্বত্বাধিকাৰীৰ এটা আবেগিক ভিডিঅ' ছ'ছিয়েল মিডিয়াত ভাইৰেল হোৱাৰ পিছতে এটা নিশাৰ ভিতৰতে বলীউড তাৰকাসহ বহু লোকে ভিৰ কৰিছিলহি এই ধাবাখনত।

লগতে পঢ়ক:পঞ্জাৱ আৰু ছত্তিশগড়ৰ পিচত ৰাজস্থানতো উত্থাপন কৃষি আইন বিৰোধী বিধেয়ক