বন্দে ভাৰত অভিযান : এয়াৰ ইণ্ডিয়াই চলাব অতিৰিক্ত বিমান

এয়াৰ ইণ্ডিয়াই 4 জুনৰ পৰা 6 জুনৰ ভিতৰত অতিৰিক্ত বিমানৰ চলাচল কৰিব আৰু বিদেশত আবদ্ধ লোকক ভাৰতলৈ প্ৰত্যাৱৰ্তন কৰিব । টুইটৰ জৰিয়তে কেন্দ্ৰীয় অসামৰিক বিমান মন্ত্ৰী হৰদ্বীপ সিং পুৰীয়ে এই কথা অৱগত কৰে ।

নিউজ ডেস্ক, 30 মে': অসামৰিক বিমান মন্ত্ৰী হৰদ্বীপ সিং পুৰীয়ে জনাই যে, এয়াৰ ইণ্ডিয়াই 4 জুনৰ পৰা 6 জুনৰ ভিতৰত অতিৰিক্ত বিমানৰ চলাচল কৰিব আৰু বিদেশত আবদ্ধ লোকক ভাৰতলৈ প্ৰত্যাৱৰ্তন কৰিব । টুইটৰ জৰিয়তে মন্ত্ৰী গৰাকীয়ে প্ৰকাশ কৰে এই কথা । লগতে তেওঁ জনাই যে, শুকুৰবাৰৰ পুৱা 11 বজাৰ পৰা টিকট বুকিং আৰম্ভ হৈছে ।

বিমানসমূহে ব্ৰিটেইন, আমেৰিকা, জাৰ্মানী, দক্ষিণ কোৰিয়া, নিউজিলেণ্ড আৰু ছুইডেনত থকা লোকসকলক উদ্ধাৰ কৰি ভাৰতলৈ আনিব । কৰ'ণা ভাইৰাছ সংকটৰ সময়ত বিদেশী ৰাষ্ট্ৰ কেইখনত আবদ্ধ হৈ আছিল বহু ভাৰতীয় ।

ভাৰত চৰকাৰে 7 মে'ৰ পৰা বিদেশত আবদ্ধ লোকক উদ্ধাৰৰ বাবে এই অভিযান আৰম্ভ কৰিছিল । প্ৰথম পৰ্যায় 7 মে'ৰ পৰা আৰম্ভ হৈ 13 মে'ত সমাপ্ত হৈছিল । এই অভিযানৰ জৰিয়তে 64 খন বিমানেৰে বিদেশত আবদ্ধ 14,800 লোকক ভাৰতলৈ অনাৰ ব্য়ৱস্থা কৰা হৈছিল ।

আনহাতে দ্বিতীয় পৰ্যায় আৰম্ভ হৈছিল 17 মে'ৰ পৰা 13 জুনলৈ চলিব । য'ত 60 খন বিদেশী ৰাষ্ট্ৰত থকা প্ৰবাসী লোকসকলক উদ্ধাৰ কৰা হ'ব ।