প্ৰযুক্তিৰ ব্যৱহাৰেৰে ক্ষতি হোৱা শিক্ষাৰ পৰা পৰিত্ৰাণৰ পৰামৰ্শ কেজৰিৱাল চৰকাৰৰ

লক ডাউনৰ ফলত হোৱা শিক্ষামূলক ক্ষতিৰ পৰ্যালোচনাৰ বাবে উপ মুখ্যমন্ত্ৰী সহ বিশ্ববিদ্যালয়ৰ উপাধ্যক্ষ সকলৰ সৈতে মিলিত হৈছিল দিল্লীৰ মুখ্যমন্ত্ৰী অৰবিন্দ কেজৰিৱাল । তাৰ পাচতেই প্ৰযুক্তিৰ সৰ্বাধিক ব্যৱহাৰৰ বাবে আহ্বান জনাই মুখ্যমন্ত্ৰী গৰাকীয়ে ।

নিউজ ডেস্কঃ লক ডাউনৰ ফলত বহু দিনৰ পৰাই বন্ধ হৈ আছে শিক্ষানুষ্ঠান সমূহ । সেয়ে শিক্ষাৰ ক্ষেত্ৰতো লোকচানৰ সন্মূখীন হৈছে শিক্ষাৰ্থী সকল । এই লোকচানৰ পৰ্যালোচনা কৰিবলৈ শুকুৰবাৰে ভিডিঅ' কনফাৰেন্স যোগে দিল্লীৰ মুখ্যমন্ত্ৰী অৰবিন্দ কেজৰিৱাল আৰু উপ মুখ্যমন্ত্ৰী মনিষ ছিচদিয়া মিলিত হৈছিল দিল্লী চৰকাৰৰ অন্তৰ্গত বিশ্ববিদ্যালয় সমূহৰ উপাধ্যক্ষৰ সৈতে ।

এই আলোচনাত নতুন শিক্ষাবৰ্ষ সম্পৰ্কে আৰু এইবাৰৰ উত্তীৰ্ণ সকলৰ সংস্থাপন সম্পৰ্কেও আলোচনা কৰে ।

কিছু পৰীক্ষা বাকী থকাৰ কথা জনাই উপাধ্যক্ষ সকলে । একাংশই সংস্থাপন পাইছে কিন্তু চূড়ান্ত পৰীক্ষা অনুষ্ঠিত হোৱা নাই । যাৰ বাবে তেওঁলোকে ডিগ্ৰী লাভৰ প্ৰমাণপত্ৰৰ পৰা বঞ্চিত হ'ব আৰু চাকৰিত যোগদানৰ ক্ষেত্ৰত অসুবিধাৰ সন্মূখীন হ'ব ।

এনে সমস্যাৰ পৰা ৰক্ষা পাবলৈ ছাত্ৰ সকলক অস্থায়ী প্ৰমাণ পত্ৰ দিয়াৰ সিদ্ধান্ত লোৱা হয় ।

আনহাতে বাকী ৰোৱা পৰীক্ষা অনলাইনত অনুষ্ঠিত কৰিবৰ বাবে উপাধ্যক্ষ সকলে ইচ্চা প্ৰকাশ কৰে ।

দিল্লীৰ মুখ্যমন্ত্ৰী গৰাকীয়ে এই জটিল সময়ত সৰ্বতোপ্ৰকাৰে বিশ্ববিদ্যালয় সমূহক সহায় কৰাৰ প্ৰতিশ্ৰুতি প্ৰদান কৰে আৰু ক্ষতি হোৱা শিক্ষাৰ পৰিত্ৰাণৰ বাবে যিমান সম্ভৱ প্ৰযুক্তিৰ ব্যৱহাৰ কৰিবলৈ বিশ্ববিদ্যালয় সমূহক আহ্বান জনায় ।

লগতে তেওঁ কয় যে, যিহেতু সামাজিক দূৰত্বই কৰ'ণা ভাইৰাছৰ পৰা বাচিব পৰা উপায়, সেয়ে বিশ্ববিদ্যালয় খোলাৰ পাচতো যাতে এই নিয়ম সমূহ মানি চলে তাৰ বাবেও আহ্বান জনাই ।