নেশ্যনেল ডেস্ক, 22 ফেব্ৰুৱাৰীঃ মাৰ্কিন ৰাষ্ট্ৰপতি ড’নাল্ড ট্ৰাম্প অহা 24 আৰু 25 ফেব্ৰুৱাৰীত প্ৰথমবাৰৰ বাবে ভাৰত ভ্ৰমণলৈ আহিব ৷ ইতিমধ্যেই ট্ৰাম্পৰ ভ্ৰমণৰ বাবে সাজু সকলো প্ৰস্তুতি ৷ 24 ফেব্ৰুৱাৰীত মাত্ৰ তিনি ঘন্টাৰ বাবে আহমেদাবাদত উপস্থিত হ’বলগীয়া ট্ৰাম্পৰ ভ্ৰমণৰ সময়চোৱাত গুজৰাট চৰকাৰৰ ব্যয় হ’ব প্ৰায় 85 কোটি টকা ৷ আহমেদাবাদ কৰ্তৃপক্ষই তিনি ঘন্টীয়া ট্ৰাম্প ভ্ৰমণৰ বাবে যাৱতীয় সকলো প্ৰস্তুতিৰ বাবে 80ৰ পৰা 85 কোটি টকা (11-12 মিলিয়ন ডলাৰ) ব্যয় হ’ব বুলি ধাৰণা কৰিছে ৷ আনহাতে এই ব্যয় গুজৰাটৰ বাৰ্ষিক বাজেটৰ গৃহ বিভাগৰ 1.5% ৰ সমতুল্য বুলি উল্লেখ কৰে ৷
ৰয়টাৰে প্ৰকাশ কৰা তথ্য অনুসৰি ট্ৰাম্পৰ সুৰক্ষাৰ ক্ষেত্ৰত 12,000 আৰক্ষী গুজৰাট প্ৰশাসনে নিজস্বভাৱে বিশেষভাৱে গঠন কৰিছে ৷
বিজয় নেহৰাই উল্লেখ কৰে যে বৰ্তমানলৈ আন্তঃগাঁথনি তথা মোটেৰা ক্ৰিকেট ষ্টেডিয়ামৰ চৌপাশ উন্নত কৰাৰ ক্ষেত্ৰত সৰ্বমুঠ ব্যয় হৈছে 30 কোটি টকা ৷
আহমেদাবাদ বিমানবন্দৰৰ পৰা মোটেৰা ষ্টেডিয়ামলৈ যোৱা 20 কিঃমি পথত নতুনকৈ 18 টা পথ নিৰ্মাণ কৰা হৈছে ৷ নেহৰাই উল্লেখ কৰে যে গুজৰাট ক্ৰিকেট সংস্থাৰ সম্পাদক অশোক ব্ৰমভাট্টে জনোৱা অনুসৰি মুকলিৰ বাবে সম্পূৰ্ণ সাজু ষ্টেডিয়ামখন ৷ ট্ৰাম্পে উদ্বোধনী কৰিবলগীয়া ষ্টেডিয়ামখনত প্ৰায় 1 লাখ মানুহ উপস্থিত থাকিব বুলি ধাৰণা কৰা হৈছে ৷
আনহাতে আহমেদাবাদ চহৰখনৰ সৌন্দৰ্যবৰ্ধনৰ বাবে 6 কোটি টকা ব্যয় হৈছে ৷ আনহাতে ট্ৰাম্পে কৰিবলগীয়া ৰোড শ্ব’ৰ বাবে 2000তকৈ অধিক দুখীয়া শ্ৰেণীৰ লোকে বসবাস কৰা বস্তি অঞ্চলসমূহ ঢাকি দিয়াৰ বাবে আধা কিঃমি দৈৰ্ঘৰ এখন দেৱাল নিৰ্মাণ কৰা হৈছে ৷
দুদিনীয়া ভ্ৰমণসূচীৰে ভাৰতলৈ আহিবলগীয়া মাৰ্কিন ৰাষ্ট্ৰপতি ট্ৰাম্পে 24 ফেব্ৰুৱাৰী ভাৰতৰ প্ৰধানমন্ত্ৰী নৰেন্দ্ৰ মোডীৰ সৈতে নৱনিৰ্মিত বিশ্বৰ সৰ্ববৃবৎ ক্ৰিকেট ষ্টেডিয়াম মোটেৰাত ‘নমস্তে ট্ৰাম্প’ শীৰ্ষক এক বিশাল কাৰ্যসূচীত অংশগ্ৰহণ কৰিব ৷ আনহাতে এই অনুষ্ঠানৰ পিচত সন্ধিয়া ট্ৰাম্পে আমেৰিকাৰ ফাৰ্ষ্ট লেডী তথা নিজৰ পত্নীৰ সৈতে তাজমহল দৰ্শনৰ বাবে আগ্ৰালৈ ৰাওনা হ’ব ৷ ইয়াৰ পিচত 25 ফেব্ৰুৱাৰীৰ পুৱা মাৰ্কিন ৰাষ্ট্ৰপতিগৰাকীয়ে নতুন দিল্লীৰ ৰাষ্ট্ৰপতি ভৱনত এক মুকলি সংবাদমেলত অংশগ্ৰহণ কৰিব ৷ সংবাদমেলৰ পিচত তেওঁ ৰাজঘাটত থকা মহাত্মা গান্ধীৰ সমাধিক্ষেত্ৰ দৰ্শন কৰিব ৷ তাৰ পিচত তেওঁ দিল্লীস্থিত হায়দৰাবাদ হাউচত এক দ্বি-পাক্ষিক বৈঠকৰ পিচত দুপৰীয়াৰ আহাৰ গ্ৰহণ কৰি পুৱা 10 বজাত ৱাশ্বিংটনলৈ উৰা মাৰিব ৷
আৰু পঢ়কঃভাৰত ভ্ৰমণত ট্ৰাম্পৰ সৈতে উপস্থিত থাকিব জীয়ৰী ইবাংকা আৰু জোৱাই জেৰেড কোচনেৰ
