নিউজ ডেস্ক, 8 আগষ্ট : প্ৰধানমন্ত্ৰী নৰেন্দ্ৰ মোডী আৰু ৰাষ্ট্ৰপতি ৰামনাথ কোবিন্দে শুকুৰবাৰে কেৰালাৰ কোঝিকোডেত সংঘটিত এয়াৰ ইণ্ডিয়াৰ বিমান দুৰ্ঘটনাত গভীৰ শোক প্ৰকাশ কৰিছে ৷ সাম্প্ৰতিক পৰিস্থিতি সন্দৰ্ভত কেৰালাৰ মুখ্যমন্ত্ৰী পিনাৰাই বিজয়নৰ সৈতে বাৰ্তালাপ কৰে প্ৰধানমন্ত্ৰী মোডীয়ে ৷ নিজৰ টুইটাৰ একাউন্টৰ দ্বাৰা এটি শোকবাৰ্তা টুইট কৰি মোডীয়ে কয় যে, কোজিকোডে বিমান দুৰ্ঘটনাই মৰ্মাহত কৰিছে ৷ যি সকলে নিজৰ প্ৰিয়জনক হেৰুৱাইছে, তেওঁলোকলৈ সমবেদনা জ্ঞাপন কৰাৰ লগতে আহত সকলৰ শীঘ্ৰে আৰোগ্য হোৱাটো কামনা কৰে মোডীয়ে ৷ ইয়াৰ লগতে ভুক্তভোগীসকলক যাৱতীয় সকলো সা-সুবিধা প্ৰদান কৰা হ’ব বুলি জনায় প্ৰধানমন্ত্ৰীগৰাকীয়ে ৷
ৰাষ্ট্ৰপতি ৰামনাথ কোবিন্দেও ঘটনা সন্দৰ্ভত কেৰালাৰ ৰাজ্যপাল আৰিফ মহম্মদ খানৰ সৈতে বাৰ্তালাপ কৰি পৰিস্থিতিৰ বুজ লয় ৷ নিজৰ টুইটাৰত কোবিন্দে প্ৰকাশ কৰে য়ে, কোঝিকোডেত সংঘটিত এয়াৰ ইণ্ডিয়াৰ বিমান দুৰ্ঘটনাৰ খবৰে অতিশয় দুঃখিত কৰিছে ৷ ভুক্তভোগী আৰু তেওঁলোকৰ পৰিয়ালবৰ্গলৈ গভীৰ সমবেদনা জ্ঞাপন কৰে ৰাষ্ট্ৰপতিগৰাকীয়ে ৷
কংগ্ৰেছৰ সাধাৰণ সম্পাদক প্ৰিয়ংকা গান্ধী ৱাদ্ৰাইও এই শোকাৱহ বিমান দুৰ্ঘটনা সন্দৰ্ভত গভীৰ দুখ প্ৰকাশ কৰে ৷ নিজৰ শোকবাৰ্তাত তেওঁ এই বিমান দুৰ্ঘটনাত পতিত সকল আৰু তেওঁলোকৰ পৰিয়াললৈ সমবেদনা জনায় ৷