নেশ্যনেল ডেস্ক, 5 ফেব্ৰুৱাৰী :নতুন কৃষি আইন বাতিলৰ দাবীত দৃঢ় হৈ শ শ কৃষকে জাৰত অতিবাহিত কৰিছে এটাৰ পাচত আনটো ৰাতি ৷ দিল্লী-উত্তৰ প্ৰদেশ সীমান্তত তেওঁলোকৰ অত্যাধিক সুৰক্ষিত প্ৰতিবাদী স্থান গাজিপুৰত বৃহস্পতিবাৰেও পাৰ কৰিছিল উজাগৰী নিশা ৷ উল্লেখ্য যে,নৱেম্বৰৰ পৰা চলি থকা এই আন্দোলনৰ নেতৃত্ব দি আহিছে ভাৰতীয় কিষান ইউনিয়নৰ নেতা ৰাকেশ টিকাইটে ৷ ইপিনে এই আন্দোলন চলিত বৰ্ষৰ অক্টোবৰ মাহ পৰ্যন্ত চলিব বুলি প্ৰকাশ কৰে নেতাগৰাকীয়ে ৷
তেওঁ প্ৰধানমন্ত্ৰী নৰেন্দ্ৰ মোদীক গাজীপুৰ,টিকৰি আৰু সিংগুৰ প্ৰতিবাদী স্থানৰ সুৰক্ষাৰ ক্ষেত্ৰত কটাক্ষ কৰা পৰিলক্ষিত হৈছে ৷ লগতে তেওঁ প্ৰস্তাৱিত ৬ ফেব্ৰুৱাৰী 'চক্কা জাম'ৰ বিৱৰণ সংবাদ মাধ্যমৰ আগত সদৰি কৰে ৷ তেওঁ কয় যে দিল্লীত অৱৰোধ কৰা নহ'ব কিন্তু উত্তৰ প্ৰদেশ,হাৰিয়ানা আৰু ৰাজস্থানৰ কিছু অংশ আৰু দক্ষিণৰ ৰাজ্যকে ধৰি বাকী ৰাজধানী অঞ্চলৰ অন্যান্য অংশত অনুষ্ঠিত হ'ব এই প্ৰতিবাদী অনুষ্ঠান ৷
'আমি দিল্লীত একো নকৰো, তাত থকা ৰজাই ইতিমধ্যে ইয়াক সুৰক্ষিত কৰিছে, এতিয়া আমাৰ অৱৰোধ কৰাৰ কোনো প্ৰয়োজন নাই 'এনেদৰে তেওঁ সাংবাদিক সকলক সদৰি কৰে ৷ প্ৰস্তাৱিত 'চককা জাম'ৰ বিষয়ে তেওঁ কয় যে এই কাৰ্যসূচীত তিনি ঘণ্টাৰ বাবে পথ অৱৰোধ কৰা হ'ব। এয়া দিল্লীত নহ'ব কিন্তু দেশৰ অন্যান্য অংশতহে হ’ব । অহা আৰু বন্ধ হোৱা বাহনবোৰক পানী আৰু খাদ্যৰ যোগান ধৰা হ’ব বুলিয়ো প্ৰকাশ কৰে নেতাগৰাকীয়ে ৷
২৬ জানুৱাৰীৰ হিংসাত্মক ঘটনাটোৰ পাচতেই এক সংক্ষিপ্ত নিৰৱতাৰ অন্তত কৃষকসকলৰ প্ৰতিবাদ পুনৰুজ্জীৱিত কৰাৰ কৃতিত্ব দিয়া প্ৰভাৱশালী কৃষক নেতাগৰাকীয়ে কয় যে বিতৰ্কিত আইন বাতিলৰ আন্দোলন অক্টোবৰলৈকে অব্যাহত থাকিব পাৰে ।