গুৱাহাটী,15 জানুৱাৰীঃ গুৱাহাটীত অনুষ্ঠিত খেল’ ইণ্ডিয়াৰ বুধবাৰে ষষ্ঠ দিন । ভোগালীৰ আনন্দ-উছাহৰ মাজতে মহানগৰীৰ ক্ৰীড়াস্থলীসমূহত চলি আছে খেল’ ইণ্ডিয়াৰ বিভিন্ন প্ৰতিযোগিতা । অসমীয়াৰ হেঁপাহৰ এই উৎসৱৰ দিনতে খেল’ ইণ্ডিয়াত শ্ৰেষ্ঠত্ব প্ৰতিপন্ন সাব্যস্ত কৰিবলৈ সক্ষম হয় অসমৰ খেলুৱৈয়ে ৷ খেলুৱৈসকলে আঁজুৰিবলৈ সক্ষম হয় তিনিটাকৈ স্বৰ্ণ পদক ।
বিশেষকৈ বুধবাৰৰ দিনটোত লন বলত উজলি উঠে অসমৰ খেলুৱৈ । প্ৰতিযোগিতাখনৰ ২১ অনুৰ্ধৰ মহিলা শাখাত ব্ৰঞ্জৰ পদক অৰ্জন কৰিবলৈ সক্ষম হয় জিনু গগৈ নামৰ এগৰাকী যুৱতীয়ে । দৰিদ্ৰ ঘৰৰ যুৱতীগৰাকীয়ে পদক লাভেৰে দৰিদ্ৰতা যে কোনো কাৰণত সফলতাৰ হেঙাৰ হ’ব নোৱাৰে তাক প্ৰমাণ কৰে ৷
ভোগালীৰ আনন্দৰ মাজতে সুখবৰ ইফালে, ল’ৰাৰ লন বল একক শাখাত সুৰজিৎ বুঢ়াগোঁহাই,ছোৱালীৰ ত্ৰিপুল শাখাত অনিন্দিতা কাকতি, সুমন কুমাৰী পাণ্ডে,সুৰঞ্জনা বৰুৱা আৰু ল’ৰাৰ ফ’ৰ শাখাত শিৱ মহন্ত, সঞ্জু বান্দে, ৰক্তিম কাশ্যপ কলিতা আৰু অভিলেখ সন্দিকৈয়ে অসমৰ হৈ লাভ কৰে স্বৰ্ণ পদক । চাইক্লিঙৰ ১৭ অনুৰ্ধৰ ল’ৰাৰ শাখাত ৰিমঞ্জু ৰায়ে ব্ৰঞ্জৰ পদক অৰ্জন কৰিবলৈ সক্ষম হয় । ইপিনে ভলীবলৰ ১৭ অনুৰ্ধৰ ছোৱালীৰ শাখাত কৰ্ণাটকে লাভ কৰে ব্ৰঞ্জৰ পদক । স্বৰ্ণ জয়ৰ লক্ষ্যৰে প্ৰতিযোগিতাত অংশ লোৱা দলটোৱে পদক অৰ্জনৰ পিছত অসন্তুষ্টি ব্যক্ত কৰে ।
উল্লেখ্য যে,মেগা ইভেণ্ট খনৰ ষষ্ঠ দিনাৰ ফলাফল অনুসৰি ২৮ স্বৰ্ণ,৩২ ৰূপ,৫০ ব্ৰঞ্জৰ পদক লাভ কৰি তালিকাৰ শীৰ্ষত অক্ষত আছে মহাৰাষ্ট্ৰ । তদুপৰি ২৩ সোণ, ২৫ ৰূপ, ২৫ ব্ৰঞ্জৰ পদকৰে হাৰিয়ানাৰ দ্বিতীয় স্থান, ১৭ সোণ, ১৩ ৰূপ, ১৮ ব্ৰঞ্জৰ পদকেৰে তৃতীয় স্থান দখল কৰিছে উত্তৰ প্ৰদেশে ৷ আয়োজক ৰাজ্য অসমে ৬ সোণ, ৭ ৰূপ, ১০ ব্ৰঞ্জৰ পদক অৰ্জনেৰে তালিকাৰ ১২ নং স্থানত আছে ৷
লগতে চাওকঃসুদীৰ্ঘ চল্লিশটা বছৰ পাচত মাতৃ-কন্যাৰ মহামিলন
