নেশ্যনেল ডেস্ক, ৭অক্টোবৰ: সমগ্ৰ বিশ্বতে ত্ৰাসৰ সৃষ্টি কৰা COVID-19ৰ প্ৰতিৰোধৰ বাবে ভেকচিন প্ৰস্তুতক লৈ যুটীয়াভাৱে কাম কৰিছে ইণ্ডিয়ান কাউন্সিল ফৰ মেডিকেল ৰিচাৰ্চ আৰু ভাৰত বায়'টেকে। চলিত বৰ্ষৰ অহা নৱেম্বৰ মাহত সম্পন্ন হ'ব COVAXINৰ তৃতীয় তথা অন্তিম পৰ্যায়ৰ পৰীক্ষণ। এই পৰীক্ষণ নৱেম্বৰ মাহৰ প্ৰথম অথবা দ্বিতীয় সপ্তাহত আৰম্ভ হোৱাৰ সম্ভাৱনা প্ৰকট কৰিছে নিজাম ইনষ্টিটিউট অৱ মেডিকেল ছায়েন্সৰ এক সূত্ৰই।
নোডেল বিষয়া ডা০ প্ৰভাকৰ ৰেড্ডীয়ে কয় যে, নিজাম ইনষ্টিটিউট অৱ মেডিকেল ছায়েন্সত ইতিমধ্যে প্ৰথম পৰ্যায়ৰ পৰীক্ষণ সফলভাৱে সম্পন্ন হৈছে। দ্বিতীয় পৰ্যায়ত ১২গৰাকী লোকক ৰোগ প্ৰতিৰোধী ক্ষমতা বৃদ্ধিৰ বাবে ঔষধ দিয়া হ'ব আৰু আন ৫৫গৰাকী লোকৰ টীকাকৰণ কৰা হ'ব। ১৪দিনৰ অন্তত তেজৰ নমুনা সংগ্ৰহ কৰি ইণ্ডিয়ান কাউন্সিল ফৰ মেডিকেল ৰিচাৰ্চলৈ প্ৰেৰণ কৰা হ'ব। ইফালে, চিকিৎসকে প্ৰকাশ কৰিছে যে, প্ৰথম পৰ্যায়ত টীকাকৰণ কৰা ৪৫গৰাকী লোকৰ ফলাফল আশাব্যঞ্জক আছিল।