নিউজডেস্ক, 14 ডিচেম্বৰ : নাগৰিকত্ব সংশোধনী আইনক লৈ শনিবাৰেও উত্তেজনাই বিৰাজ কৰিছে পশ্চিমবংগত ৷ শুকুৰবাৰে নাগৰিকত্ব সংশোধনী আইন বাতিলৰ দাবীত ৰাজ্যখনত প্ৰতিবাদকাৰীয়ে পথ অৱৰোধ কৰাৰ লগতে ভাঙি চূড়মাৰ কৰে ৰে'ল ষ্টেচন ৷ যাৰ ফলত পশ্চিমবংগত যান-বাহনৰ চলাচল ব্যাহত হৈ পৰাৰ লগতে অচল স্তব্ধ হৈ পৰিছে জনজীৱন ৷
নাগৰিকত্ব সংশোধনী আইন বিৰোধী প্ৰতিবাদ শুকুৰবাৰে, নাগৰিকত্ব সংশোধনী আইন আৰু এন আৰ চি প্ৰত্যাহাৰ কৰাৰ দাবীত মুৰ্শিদাবাদত বিশাল প্ৰতিবাদ সাব্যস্ত কৰা হয় ৷ প্ৰতিবাদকাৰীয়ে বেলদাংগা ৰে'ল ষ্টেচন ভাঙি চূড়মাৰ কৰাৰ লগতে ৰে'ল কৰ্মচাৰীক পলায়ন কৰিবলৈ বাধ্য কৰে ৷ ষ্টেচনমাষ্টৰৰ কক্ষলৈ জোঁৰ লৈ গৈ প্ৰতিবাদকাৰীয়ে জ্বলাই দিয়াৰ চেষ্টা কৰাৰ লগতে টিকট ঘৰো লুটি নিয়ে ৷ প্ৰতিবাদকাৰীৰ ৰে'ল পথ অৱৰোধৰ ফলত ব্যাহত হৈ পৰে লালগোলা আৰু কৃষ্ণনগৰৰ মাজত ৰে'ল চলাচল ৷
প্ৰতিবাদত স্তব্ধ পশ্চিম বংগ ইফালে আন এটা বিশাল প্ৰতিবাদকাৰীৰ দলে বেলদাংগাৰ ৰাষ্ট্ৰীয় ঘাইপথত টায়াৰ জ্বলোৱাৰ লগতে বিভিন্ন যান-বাহনৰ ক্ষতি সাধন কৰি প্ৰতিবাদ সাব্যস্ত কৰে ৷ প্ৰতিবাদকাৰীৰ ক্ষোভৰ পৰা সাৰি নগ'ল এম্বুলেঞ্চো ৷ মুৰ্শিদাবাদৰ জালংগী, ৰঘুনাথগঞ্জ, শ্বাহামশ্বেৰগঞ্জ, কান্দি, বাহৰামপুৰ আৰু দমকল আদি অঞ্চলত বৰ্তমানেও ব্যাহত হৈ আছে যান-বাহনৰ চলাচল ৷
লগতে পঢ়ক : ইন্টাৰনেটত বাংলাদেশী হিন্দুৱে ভাৰতীয় সীমা পাৰ কৰা ভুৱা ভিডিঅ' প্ৰচাৰ
আনহতে, হাওৰা জিলাত ক্ষুব্ধ প্ৰতিবাদকাৰীয়ে দক্ষিণ-পূৱ সীমান্ত ৰে'লৱেৰ অন্তৰ্গত উলুবেৰিয়া ষ্টেচনত প্ৰৱেশ কৰি ষ্টেচনটোৰ ব্যাপক ক্ষতি সাধন কৰে ৷ প্ৰথমে প্ৰতিবাদকাৰীয়ে ৰে'লপথ অৱৰোধ কৰে আৰু পৰৱৰ্তী সময়চোৱাত হাওৰা-খড়্গপুৰ সংযোগী ৰে'লপথত চলন্ত ৰে'লত আক্ৰমণ চলাই ৷ হাওৰা-কৰমণ্ডল এক্সপ্ৰেছ আৰু হাওৰা-দিঘা কাণ্ডাৰী এক্সপ্ৰেছৰ বিস্তৰ ক্ষতিসাধন কৰে প্ৰতিবাদকাৰীয়ে ৷
পশ্চিমবংগৰ ৰাজ্যপাল জগদীশ ধনকাৰে আইন-শৃংখলা অটুট ৰাখিবলৈ জনতাক আহ্বান জনোৱাৰ লগতে, নাগৰিকত্ব সংশোধনী আইনৰ বাবে সংঘটিত হিংসাত্মক কাৰ্যক দুৰ্ভাগ্যজনক আখ্যা দিয়ে ৷ আনহাতে, ভাৰতীয় জনতা পাৰ্টীয়ে নাগৰিকত্ব সংশোধনী আইন বাতিলৰ দাবীত আৰম্ভ হোৱা প্ৰতিবাদৰ বাবে মুখ্যমন্ত্ৰী মমতা বেনাৰ্জীকেই জগৰীয়া কৰিছে ৷ পশ্চিমবংগৰ দায়িত্বত থকা ভাৰতীয় জনতা পাৰ্টীৰ ৰাষ্ট্ৰীয় সাধাৰণ সম্পাদক বিজয়বৰ্গিয়াৰ অভিয়োগ অনুসৰি ৰাজ্যখনত অনুপ্ৰৱেশকাৰীৰ দ্বাৰা এই লজ্জাজনক কাৰ্য পৰিচালিত হৈছে ৷ পশ্চিমবংগ আৰু উত্তৰ-পূৰ্বাঞ্চলত বিশেষকৈ অসম, ত্ৰিপুৰা আৰু মেঘালয়ত নাগৰিকত্ব সংশোধনী আইনৰ বিৰুদ্ধে তীব্ৰ প্ৰতিবাদ সাব্যস্ত কৰা দেখিবলৈ পোৱা গৈছে ৷
লগতে পঢ়ক : অগ্নিগৰ্ভা অসমঃ এই জুই নুমাব কেতিয়া ?
