চৰকাৰী চিকিৎসকৰ স্নাতকোত্তৰ পাঠ্যক্ৰমত নামভৰ্তিৰ ক্ষেত্ৰত উচ্চতম ন্যায়ালয়ৰ বিশেষ ঘোষণা
স্নাতকোত্তৰ পাঠ্যক্ৰমৰ নামভৰ্তিত দেশৰ দুৰ্গম অঞ্চলত কৰ্তব্যৰত চৰকাৰী চিকিৎসকৰ বাবে আসন সংৰক্ষণৰ ক্ষমতা আছে প্ৰতিখন ৰাজ্যৰ: উচ্চতম ন্যায়ালয়। মেডিকেল কাউঞ্চিল অৱ ইণ্ডিয়াই এনে ধৰণে আসন সংৰক্ষণ বৰ্জিত কৰা কাৰ্যক অসাংবিধানিক আখ্যা দিয়ে শীৰ্ষ আদালতে।
নেশ্যনেল ডেস্ক,৩১আগষ্ট: স্নাতকোত্তৰ পাঠ্যক্ৰমৰ বাবে আগ্ৰহী চৰকাৰী চিকিৎসকৰ বাবে সুখবৰ । দুৰ্গম অঞ্চলত কৰ্তব্যৰত চৰকাৰী চিকিৎসকক স্নাতকোত্তৰ পাঠ্যক্ৰমৰ নামভৰ্তিৰ ক্ষেত্ৰত অগ্ৰাধিকাৰ দিয়াৰ ক্ষেত্ৰত ৰাজ্য চৰকাৰৰ ক্ষমতা আছে বুলি ঘোষণা কৰিছে উচ্চতম ন্যায়ালয়ে । সোমবাৰে ন্যায়াধীশ অৰুণ মিশ্ৰৰ নেতৃত্বত ৫ জনীয়া ন্যায়াধীশৰ বিচাৰপীঠে আসন সংৰক্ষণৰ ক্ষেত্ৰত ৰাজ্য চৰকাৰৰ ক্ষমতা আছে বুলি ৰায়দান দিয়ে । বিচাৰপীঠে কয় যে, 'মেডিকেল কাউঞ্চিল অৱ ইণ্ডিয়াই এনে ধৰণে আসন সংৰক্ষণ কাৰ্যক মানি নলয়, যিটো অসাংবিধানিক'। লগতে মেডিকেল কাউঞ্চিল অৱ ইণ্ডিয়া বৈধ নিকায় আৰু সংৰক্ষণৰ নিয়ম-নীতি প্ৰস্তুত কৰাৰ কোনো অধিকাৰ নাই। তামিলনাডু মেডিকেল এছ'চিয়েছন আৰু আন একাংশ লোকৰ আবেদনৰ শুনানিত এই ৰায়দান দিয়ে উচ্চতম ন্যায়ালয়ে । এনে পদক্ষেপে দুৰ্গম অঞ্চলৰ স্বাস্থ্যকেন্দ্ৰত কৰ্তব্যৰত নিষ্ঠাবান চৰকাৰী চিকিত্সকক উৎসাহিত কৰিব ।