নিউজ ডেস্ক, 29 এপ্ৰিলঃ পূৰ্বে ঘোষণা কৰা প্ৰাৰ্থীক বদলি কৰি সমাজবাদী পাৰ্টীয়ে তেওঁৰ ঠাইত সোমবাৰে নিক্ষেপ কৰিলে প্ৰাক্তন বিএচএফ জোৱান তেজ বাহাদুৰ যাদৱক ৷ উল্লেখ্য যে, তেজ বাহাদুৰে নিৰ্দলীয় প্ৰাৰ্থী হিচাপে নিৰ্বাচনী যুজঁত অৱতীৰ্ণ হোৱা কথা আছিল যদিও প্ৰধানমন্ত্ৰী নৰেন্দ্ৰ মোদীৰ বিৰুদ্ধে সমাজবাদী পাৰ্টীয়ে তেওঁ থিয় কৰোৱাৰ সিদ্ধান্ত গ্ৰহণ কৰে ৷
লগতে পঢ়ক: আহি আছে ফেনী! দক্ষিণ ভাৰতত সতৰ্কতা জাৰী
উল্লেখ্য যে, তেজ বাহাদুৰ যাদৱক 2017 চনত চাকৰিৰ পৰা অব্যাহতি দিয়া হৈছিল ৷ ভাৰত পাকিস্তান সীমান্তত থকা বিএচএফৰ কেম্পত যোগান ধৰা খাদ্যৰ বিৰুদ্ধে অভিযোগ উত্থাপন কৰি এক ভিডিঅ’ চ’চিয়েল মিডিয়াত মুকলি কৰাৰ অপৰাধতে বাবে তেওঁক কৰ্তব্যৰ পৰা অব্যাহতি দিয়া হৈছিল ৷ বিএচএফ কেম্পৰ পৰা চ’চিয়েল মিডিয়াত বাহাদুৰে আপ্লোড কৰা চাৰিটা ভিডিঅ’ই সমগ্ৰ দেশতে খলকনি তুলিছিল ৷
সমাজবাদী পাৰ্টীয়ে বহুজন সমাজ পাৰ্টী, ৰাষ্ট্ৰীয় লোক দলৰ লগত মিত্ৰজোঁটত লোকসভা নিৰ্বাচনত অৱতীৰ্ণ হৈছে ৷ ইয়াৰে 37 খন আসনত সমাজবাদী পাৰ্টী, 38 খন আসনত মায়াৱতীৰ বহুজন সমাজ পাৰ্টী আৰু 3 খন আসনত অজিত সিঙৰ ৰাষ্ট্ৰীয় লোক দলে প্ৰতিদ্বন্দিতা কৰিব ৷
বাৰাণসীত অহা 19 মে’ত নিৰ্বাচন অনুস্থিত হ’ব ৷