নেশ্যনেল ডেস্ক, 21 অক্টোবৰ : আৰজেডি নেতা তেজস্বী যাদৱলৈ মঙলবাৰে এক নিৰ্বাচনী প্ৰচাৰ সভাত চেণ্ডেল নিক্ষেপ কৰে ৷ বিহাৰৰ ঔৰংগাবাদ জিলাৰ কুটুম্বা বিধানসভা আসনৰ এগৰাকী কংগ্ৰেছ প্ৰাৰ্থীৰ হৈ নিৰ্বাচনী প্ৰচাৰত অংশগ্ৰহণ কৰাৰ সময়তে সংঘটিত হয় এই কাণ্ড ৷ আৰজেডি নেতাগৰাকী মঞ্চত বহি থকাৰ সময়তে উপস্থিত লোকৰ পৰা কোনো লোকে যাদৱলৈ চেণ্ডেল নিক্ষেপ কৰে ৷
ঘটনাৰ এক ভিডিঅ' অনুসৰি, যাদৱলৈ নিক্ষেপ কৰা এপাত চেণ্ডেল লক্ষ্যভ্ৰষ্ট হয় যদিও আনপাত আহি তেওঁৰ হাতত পৰেহি ৷ যাদৱে মঞ্চত উঠাৰ লগে লগে দলৰ কৰ্মীসকলে তেওঁৰ সমৰ্থনত শ্ল'গান দিয়াৰ সময়তে এই ঘটনা সংঘটিত হয় ৷
সূত্ৰই কয় যে, ট্ৰাই চাইকেলত বহি থকা এজন শাৰীৰিকভাৱে অক্ষম লোকে এই ঘটনা সংঘটিত কৰাৰ সন্দেহ কৰা হৈছে ৷ ইয়াৰ পাচতে লোকজনক সেই স্থানৰ পৰা আঁতৰাই নিয়া হয় ৷ কিন্তু এই ঘটনাক লৈ কোনো কাৰণতে চিন্তিত হোৱা পৰিলক্ষিত নহ'ল তেজস্বী যাদৱক ৷