নিউজ ডেস্ক, 28 ছেপ্টেম্বৰ :যিটো সময়ত চীনৰ সৈতে মুখামুখি হ'বলৈ লাডাখত ভাৰতীয় স্থলসেনাই ঘাটি পাতিছে, তেনে সময়তে পাকিস্তানে ভাৰতক আক্ৰমণ কৰিবলৈ চেষ্টা চলাই আহিছে ৷ বৰফেৰে ঢকা দুৰ্গম পাহাৰীয়া এলেকাত আমাৰ সৈনিকে বতৰৰ সৈতে যুঁজ দি আছে যদিও আন এক শত্ৰুৰ সৈতেও মুখামুখি হ'বলগীয়া হৈছে স্থলসেনা ৷
এই বিশেষ শত্ৰু হৈছে হৃদযন্ত্ৰৰ ক্ৰিয়া বন্ধ হৈ মৃত্যু ৷ হৃদযন্ত্ৰৰ ক্ৰিয়া বন্ধ হৈ চলিত ছেপ্টেম্বৰ মাহৰ ভিতৰতে ভাৰতীয় স্থলসেনাই হেৰুৱাইছে বহুকেইগৰাকী বিষয়া ৷ হৃদযন্ত্ৰৰ ক্ৰিয়া বন্ধ হৈ মৃত্যুমুখত পৰে ভাৰতীয় স্থলসেনাত কৰ্মৰত কৰ্ণেল আৰু লেফ. কৰ্ণেল পদবীৰ প্ৰায় ছগৰাকী বিষয়া ৷ লক্ষণীয় কথাটো হৈছে এই আটাইকেইগৰাকী বিষয়া শাৰিৰীকভাৱে স্বাস্থ্যৱান আছিল আৰু তেওঁলোকৰ বয়স 40-54 বছৰৰ ভিতৰত আছিল ৷ এয়া সাধাৰণ লাগিলেও সংখ্যাৰ ফালৰ পৰা এই মৃত্যু যথেষ্ট অসাধাৰণ ৷
হৃদযন্ত্ৰৰ ক্ৰিয়া বন্ধ হৈ মৃত্যুমুখত পৰা বিষয়াসকলৰ ভিতৰত কৰ্ণেল তুষাৰ তিৱাৰী (চিএমই), আৰ্টিলাৰীৰ কৰ্ণেল বোস আৰু লেফ. কৰ্ণেল মায়ংক বৰা, কৰ্ণেল অমিত চুক্লা আৰু কৰ্ণেল ধনখড় (এএছচি) আৰু কৰ্ণেল বী কে যাদৱ (ইএমই) ৷ মৃত্যুমুখত পৰা সেনা বিষয়াসকলৰ ভিতৰত আৰ্টিলাৰীৰ 346 ফিল্ড ৰেজিমেন্টৰ লেফ. কৰ্ণেল মায়ংক বৰাৰ ঘৰ অসমৰ গুৱাহাটীত আৰু তেওঁৰ মৃত্যু বিগত 26 ছেপ্টেম্বৰত উত্তৰ প্ৰদেশৰ বেৰেলিস্থিত সেনা চাউনীত হৈছিল ৷ দৰাচলতে সেনাত কৰ্মৰত বিষয়া তথা জোৱানৰ তথ্য দিয়াটো তেনেই সহজ কাম নহয় যদিও এমাহৰ ভিতৰত ছগৰাকীকৈ শীৰ্ষ বিষয়াৰ হৃদযন্ত্ৰৰ ক্ৰিয়া বন্ধ হৈ মৃত্যু হোৱাটো কোনো সাধাৰণ কথাও নহয় ৷ দেশৰ হকে যুঁজি শ্বহীদ হোৱা আৰু স্বাস্থ্যজনিত কাৰণত মৃত্যুবৰণ কৰা দুয়োটা একে নহয় আৰু এইক্ষেত্ৰত স্বাস্থ্যজনিত কাৰণত মৃত্যুবৰণ কৰা বিষয়া তথা জোৱানৰ সংখ্যা অধিক ৷