ৰাজ্যসভা নিৰ্বাচন : জয়শংকৰক প্ৰত্যাহ্বান জনোৱা জন আবেদনৰ শুনানিত স্থগিতাদেশ

যি নিৰ্বাচনৰ জৰিয়তে বৰ্তমানৰ বৈদেশিক পৰিক্ৰমা মন্ত্ৰী এছ জয়শংকৰে গুজৰাটৰ পৰা ৰাজ্যসভাৰ সাংসদ হৈছিল, সেই নিৰ্বাচনী প্ৰক্ৰিয়াক প্ৰত্যাহ্বান জনাই উচ্চতম ন্যায়ালয়ত দাখিল কৰা হৈছিল কেইখনমান জন আবেদন । সোমবাৰে উচ্চতম ন্যায়ালয়ে এই জন আবেদনৰ শুনানি ২০২১ৰ জানুৱাৰীলৈকে স্থগিত কৰে ।

নেশ্যনেল ডেস্ক, ১৪ ডিচেম্বৰ: বৈদেশিক পৰিক্ৰমা মন্ত্ৰী এছ জয়শংকৰৰ ৰাজ্যসভা নিৰ্বাচনক প্ৰত্যাহ্বান জনাই উচ্চতম ন্যায়ালয়ত দাখিল কৰা জন আবেদনৰ শুনানি অহা বৰ্ষৰ জানুৱাৰীলৈকে স্থগিত কৰিলে উচ্চতম ন্যায়ালয়ে । মুখ্য ন্যায়াধীশ এছ এ ববডেৰ অধ্যক্ষতাত বিচাৰপীঠে জন আবেদনৰ শুনানি জানুৱাৰী মাহৰ তৃতীয় সপ্তাহলৈকে স্থগিত কৰে । ইয়াৰে ভিতৰত এখন আবেদন কংগ্ৰেছ নেতা গৌৰৱ পাণ্ডিয়াই দাখিল কৰে ।

আবেদনত ৰাজ্যসভাৰ আকস্মিক আৰু নিয়মিত খালী পদ পূৰণৰ বাবে পৃথককৈ অধিসূচনা জাৰি কৰাৰ বাবে নিৰ্বাচনী আয়োগৰ ক্ষমতাক লৈ প্ৰশ্ন কৰা হৈছে । এই জন আবেদনসমূহ ২০১৯ৰ ৰাজ্যসভা উপ-নিৰ্বাচনত গুজৰাটত বিজেপিয়ে দখল কৰা দুখন আসনক লৈ জড়িত । যোৱা ৪ ফেব্ৰুৱাৰীত গুজৰাট উচ্চ ন্যায়ালয়ে কংগ্ৰেছ নেতা গৌৰৱ পাণ্ডিয়াই মন্ত্ৰী জয়শংকৰৰ বিৰুদ্ধে দাখিল কৰা আবেদন খাৰিজ কৰে ।

কংগ্ৰেছ নেতা চন্দ্ৰিকাবেন চৌদাছামা আৰু পৰেশ কুমাৰ ধনানীয়ে বিজেপি প্ৰাৰ্থী যুগলজী থাকৰেৰ বিৰুদ্ধে দাখিল কৰা আবেদনো খাৰিজ কৰে উচ্চ ন্যায়ালয়ে । চৌদাছামা আৰু পৰেশ কুমাৰ ধনানীয়ে ইয়াৰ পিছতে উচ্চতম ন্যায়ালয়ৰ দ্বাৰস্থ হয় । মন্ত্ৰী জয়শংকৰ, থাকৰেই ২০১৯ চনৰ ৫ জুলাইত উপ-নিৰ্বাচনৰ জৰিয়তে ৰাজ্যসভাৰ সদস্যতা লাভ কৰে । উপ-নিৰ্বাচনত মন্ত্ৰী জয়শংকৰে পাণ্ডিয়াক আৰু থাকৰেই চৌদাছামাক পৰাস্ত কৰে । পূৰ্বৰ শুনানিত সৰ্বোচ্চ ন্যায়ালয়ত বৈদেশিক পৰিক্ৰমা মন্ত্ৰীগৰাকীয়ে তেওঁৰ শপতনামাত কয় যে, নিৰ্বাচনী আয়োগে গ্ৰহণ কৰা ভোটদান প্ৰক্ৰিয়া অসাংবিধানিক নহয় ।

লগতে পঢ়ক:ক্ষমতাৰ ৰাগীত বলিয়ান গুপকাৰ দলে ৰাইজক ব্যতিব্যস্ত কৰিছে : স্মৃতি ইৰানী