নিউজ ডেস্ক,২২ জুলাই:বায়' ফাৰ্মাচিউটিকেল কোম্পানী গিলিয়াড চায়েঞ্চৰ দ্বাৰা প্ৰকাশিত এক তথ্য মতে,ক'ভিড-১৯ত আক্ৰান্ত ৰোগীৰ শৰীৰত এণ্টি ভাইৰেল ড্ৰাগ ৰেমদেচিভিৰ প্ৰয়োগ কৰাৰ ফলত গতানুগতিক চিকিৎসাৰ তুলনাত গুৰুতৰ ভাৱে আক্ৰান্তৰ মৃত্যুৰ হাৰ ৬২ শতাংশ পৰ্যন্ত হ্ৰাস হ'ব পাৰে ।
২৩ সংখ্যক ভাৰ্চুৱেল আন্তৰ্জাতিক এইডছ সন্মিলনত অংশগ্ৰহণ কৰি গিলিয়াড চায়েঞ্চে উল্লেখ কৰিলে এয়া এক গুৰুত্বপূৰ্ণ উদ্ভাৱন আৰু ইয়াৰ ক্লিনিকেল ট্ৰায়েলৰ নিশ্চয়তাৰ বাবে অনুমোদনৰ প্ৰয়োজন ।
সন্মিলনত বিশ্লেষণ আগবঢ়াই বায়' ফাৰ্মাচিউটিকেল কোম্পানী গিলিয়াড চায়েঞ্চে অৱগত কৰিলে যে একে সময়তে ৩১২গৰাকী ক'ভিড-১৯ত আক্ৰান্ত ৰোগীৰ শৰীৰত এণ্টি ভাইৰেল ড্ৰাগ ৰেমদেচিভিৰ প্ৰয়োগ আৰু ৮১৮ গৰাকী ক'ভিড-১৯ত আক্ৰান্তক গতানুগতিক চিকিৎসা দিয়াৰ অন্তত এক তৃতীয় পৰ্যায়ৰ অধ্যয়নৰ বিশ্লেষণ কৰি এইটো নিশ্চিত হৈছিল যে,ৰেমদেচিভিৰ প্ৰয়োগৰ ফলত ক'ভিড-১৯ত আক্ৰান্তৰ আৰোগ্যৰ ক্ষেত্ৰত বহুখিনি সুফল পাব পাৰি । তাৰোপৰি গতানুগতিক চিকিৎসাৰ তুলনাত মৃত্যুৰ হাৰ ৬২ শতাংশ পৰ্যন্ত হ্ৰাস হ'ব পাৰে ।