কৰ'ণাত আক্ৰান্ত ৰাম গোপাল বৰ্মাঃ এপ্ৰিল ফুল কৰি সমালোচনা ছ'চিয়েল মিডিয়াত

বুধবাৰে চলচ্চিত্ৰ পৰিচালক ৰাম গোপাল বৰ্মাই নিজকে কৰ'ণা পজিটিভ বুলি টুইট কৰে ৷ কিন্তু টুইটটো শ্বেয়াৰ কৰাৰ 14 মিনিট পিছতে খবৰটো মিছা বুলি পুনৰ টুইট কৰে ৷

চিটাৰা ডেস্ক,2 এপ্ৰিলঃ বলীউড ক্ষেত্ৰখনত বৰ্তমানলৈকে এগৰাকী কৰ'ণা ভাইৰাছৰ দ্বাৰা আক্ৰান্ত হৈছে ৷ সেয়া হৈছে জনপ্ৰিয় গায়িকা কণিকা কাপুৰ ৷ তেওঁক বৰ্তমান আইচ'লেচনৰ মাজত ৰখা হৈছে ৷ ইয়াৰ মাজতে বুধবাৰে চলচ্চিত্ৰ পৰিচালক ৰাম গোপাল বৰ্মাই নিজে কৰ'ণা পজিটিভ বুলি এটা টুইট কৰে ৷ টুইটটো শ্বেয়াৰৰ পিছতে আচৰিত হৈ পৰে বি-টাউনবাসীৰ লগতে তেওঁৰ সমগ্ৰ অনুৰাগী ৷ এই টুইটটো যথেষ্ট কমেন্টেৰে উপচি পৰে ক্ষন্তেকতে ৷

কিন্তু প্ৰায় 14 মিনিট পিছতে পৰিচালক গৰাকীয়ে পুনৰ এটা টুইট কৰে, য'ত তেওঁ ক্ষমা প্ৰকাশ কৰি লিখে যে তেওঁৰ চিকিৎসকে 'এপ্ৰিল ফুল' বনালে তেওঁক ৷ লগতে কয় ,এই ভুল ডক্তৰ গৰাকীৰহে তেওঁৰ নহয় ৷

কিন্তু ইয়াৰ পিছতে তেওঁ যথেষ্ট সমালোচনাৰ সন্মুখীন হয় ৷ যিটো সময়ত কৰ'ণাৰ দৰে মহামাৰীৰ লগত যুঁজি আছে সমগ্ৰ দেশে , সেই সময়ত এনেধৰণৰ ধেমালী কৰাৰ বাবে পৰিচালক গৰাকীক সমালোচনাৰে থকা-সৰকা কৰে একাংশই ৷

ইয়াৰ পিছত পৰিচালক গৰাকীয়ে পুনৰ সকলোকে ক্ষমা বিচাৰি টুইট কৰে ৷ পৰিচালকগৰাকীয়ে লিখে যে, " মই পৰিৱেশটো কিছু পাতল কৰাৰ চেষ্টা কৰিছিলো ৷ কিন্তু ধেমালীটো মোৰ ওপৰতহে কৰা হৈছিল ৷ যদি মই কাৰোবাৰ ভাৱনাক আঘাত দিছো তেন্তে মই ক্ষমা বিচাৰিছো ৷ "

লগতে পঢ়কঃজৰ্দানত আৱদ্ধ অভিনেতা পৃথ্বীৰাজ , ঘৰলৈ আহিব বিচাৰি প্ৰশাসনক গোহাৰি