স্বামীৰ মৃতদেহ টুকুৰা টুকুৰকৈ কাটি পুতি থ’লে পত্নীয়ে

ৰাজস্থানৰ যোধপুৰত এমাহ পূৰ্বে স্বামীক হত্যা কৰি মৃতদেহটো টুকুৰা-টুকুৰ কৰি কাষৰ নিৰ্মীয়মান অট্টালিকাত পুতি থোৱাৰ অভিযোগ উত্থাপিত হৈছে পত্নীৰ বিৰুদ্ধে ৷ আৰক্ষীয়ে মঙলবাৰে ঘটনাৰ সৈতে জড়িত তিনিগৰাকী মহিলাসহ এজন লোকক আটক কৰে ৷ আটকাধীন সকলৰ এগৰাকী চৰণ সিঙৰ পত্নী সীমা ৷

নেশ্যনেল ডেক্স, 14 আগষ্টঃ ৰাজস্থানৰ যোধপুৰত সংঘটিত হৈছে এক লোমহৰ্ষক হত্যাকাণ্ড ৷ এমাহ পূৰ্বে স্বামীক হত্যা কৰি মৃতদেহটো টুকুৰা-টুকুৰকৈ কাটি কাষৰ নিৰ্মীয়মান অট্টালিকাত পুতি থোৱাৰ অভিযোগ উত্থাপিত হৈছে পত্নীৰ বিৰুদ্ধে ৷ উল্লেখ্য যে, যোধপুৰৰ নন্দদী গাঁৱত প্ৰায় এমাহ পূৰ্বে চৰণ সিং নামৰ এজন লোক সন্ধানহীন হৈছিল ৷ পৰিয়ালৰ লোকৰ গোচৰৰ ভিত্তিত বনদ আৰক্ষীয়ে তদন্ত আৰম্ভ কৰে আৰু যোৱা 10 আগষ্টত অট্টালিকাটোৰ পৰা তেখেতৰ উৱলি যোৱা মৃতদেহটো উদ্ধাৰ কৰিবলৈ সক্ষম হয় ৷

আৰক্ষীয়ে মঙলবাৰে ঘটনাৰ সৈতে জড়িত তিনিগৰাকী মহিলাসহ এজন লোকক আটক কৰে ৷ আটকাধীন সকলৰ এগৰাকী চৰণ সিঙৰ পত্নী সীমা ৷ আৰক্ষীয়ে প্ৰকাশ কৰা অনুসৰি 7 বছৰ পূৰ্বে বিবাহপাশত আৱদ্ধ হৈছিল চৰণ সিং আৰু সীমা ৷ কিন্তু বিয়াৰ পিছৰে পৰা প্ৰায় পাৰিবাৰিক সংঘাতৰ সৃষ্টি হৈছিল দুয়োৰে মাজত ৷

11 জুলাইত সীমা আৰু তেখেতৰ দুই ভগ্নী ক্ৰমে ববিতা আৰু প্ৰিয়ংকাই চৰণ সিঙক খালী ফ্লেটটোলৈ মাতি আনে ৷ তাত তেঁওলোকে চৰণ সিঙক নিচাযুক্ত শীতল পানীয় খাবলৈ দিয়ে ৷ ইয়াৰ পিছতে চুবুৰীয়া ভৈয়াৰামৰ সহযোগত তিনিও ভগ্নীয়ে চৰণ সিঙক হত্যা কৰি মৃতদেহটো টুকুৰা টুকুৰকৈ কাটে ৷ আৰক্ষীৰ জেৰাত এই সমগ্ৰ ঘটনা ব্যক্ত কৰে মূল অভিযুক্ত সীমাই ৷

আমি গোচৰ ৰুজু হোৱাৰ 48 ঘন্টাৰ ভিতৰত দোষীক কৰায়ত্ব কৰিবলৈ সক্ষম হৈছো ৷ ইতিমধ্যে ঘটনাস্থলীলৈ ফৰেনচিক বিভাগৰ লোক প্ৰেৰণ কৰা হৈছে আৰু মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হ’ব বুলি মন্তব্য কৰে যোধপুৰৰ আৰক্ষী অধিক্ষক ধৰ্মেন্দ্ৰ যাদৱে ৷

লগতে পঢ়ক-গুৱাহাটীত বুজন পৰিমাণৰ ড্ৰাগছসহ দুজনক গ্ৰেপ্তাৰ