নেশ্যনেল ডেস্ক, 29 জানুৱাৰী:কেইদিনমানৰ পুৰ্বে ৰাজস্থানৰ ভৰতপুৰ জিলাত বিষাক্ত সুৰা সেৱন কৰি 7 জন লোকৰ মৃত্যু হোৱাৰ পাচতে পুনৰ অনুৰূপ ঘটনা সংঘটিত হৈছে ভীলাৱাড়া জিলাত ৷ একেদিনাই বিষাক্ত সুৰা সেৱন কৰি জিলাখনৰ খেড়া গাঁৱৰ এগৰাকী মহিলাসহ চাৰিজন লোকৰ মৃত্যু হোৱাৰ লগতে আন পাঁচ জন লোকক সংকটজনক অৱস্থাত উদ্ধাৰ কৰা হয় ৷
উল্লেখ্য যে, সংকটজনক অৱস্থাত থকা লোক কেইজনক ভীলাৱাড়াৰ মহাত্মা গান্ধী চিকিৎসালয়ত ভৰ্তি কৰোৱা হৈছে যদিও আতংকিত হৈ পৰিছে স্থানীয় লোকসকল ৷ এই ঘটনাৰ পাচতে ঘটনাস্থলীত আৰক্ষী উপস্থিত হৈ ঘটনাৰ বুজ লয় ৷ কিন্তু দীৰ্ঘদিনৰ পৰা জিলাখনত মুক্তভাৱে একাংশ লোকে স্থানীয় সুৰা বিক্ৰী কৰি আহিছে ৷ সকলো দেখিও আৰক্ষীয়ে কোনো পদক্ষেপ নোলোৱাৰ অভিযোগ উত্থাপন কৰিছে স্থানীয় লোকে ৷