পুলৱামাৰ সন্ত্ৰাসবাদী আক্ৰমণ:পাকিস্তানী টকা দিয়া হৈছিল পৰিকল্পনাকাৰীক

পুলৱামাৰ সন্ত্ৰাসবাদী আক্ৰমণত জড়িত থকাৰ অভিযোগত NIA য়ে ১৯ জন অভিযুক্তৰ বিৰুদ্ধে চাৰ্জশ্বীট দাখিল কৰাৰ পিছতে পোহৰলৈ আহিছে ন ন ঘটনা । প্ৰায় ১০ লাখ পাকিস্তানী টকা পৰিশোধ কৰা হৈছিল পুলৱামাৰ সন্ত্ৰাসবাদী আক্ৰমণৰ পৰিকল্পনাকাৰীক।

নেশ্যনেল ডেস্ক,২৭আগষ্টঃ পুলৱামাৰ সন্ত্ৰাসবাদী আক্ৰমণৰ খলনায়ক মহম্মদ উমৰ ফাৰুকক আক্ৰমণৰ পৰিকল্পনাৰ বাবে পৰিশোধ কৰা হৈছিল ১০ লাখ পাকিস্তানী টকা। এই তথ্য প্ৰকাশ কৰিছে ৰাষ্ট্ৰীয় তদন্তকাৰী সংস্থাই । পাকিস্তানৰ বেংকত থকা মহম্মদ উমৰ ফাৰুকৰ একাউণ্টত জমা কৰা হৈছিল এই ধনৰাশি । এসপ্তাহ পূৰ্বে NIAয়ে ১৯জন অভিযুক্তৰ বিৰুদ্ধে জম্মুস্থিত NIA ৰ বিশেষ আদালতত ১৩,৮০০ পৃষ্ঠাৰ চাৰ্জশ্বীট দাখিল কৰিছিল ।

উল্লেখ্য যে, ২০১৯ চনৰ ১৪ ফেব্ৰুৱাৰীত পুলৱামাৰ লেথুপুৰাত জম্মুৰ পৰা শ্ৰীনগৰ অভিমুখী অৰ্ধ সামৰিক বাহিনীৰ কনভয়ত সন্ত্ৰাসবাদীয়ে আক্ৰমণ কৰিছিল । সন্ত্ৰাসবাদী আক্ৰমণৰ পৰিকল্পনাৰ মূলতে আছিল মহম্মদ উমৰ ফাৰুক । মুখ্য অভিযুক্ত মহম্মদ উমৰ ফাৰুকে ২০১৬-২০১৭ চনত আফগানিস্তানত বিস্ফোৰক সামগ্ৰীৰ ব্যৱহাৰৰ ওপৰত প্ৰশিক্ষণ লৈছিল আৰু জম্মুৰ ছাম্বা ছেক্টৰেৰে ভাৰতত প্ৰৱেশ কৰিছিল । পাকিস্তানৰ পৰা লগত অহা ৩টা সহযোগী আৰু স্থানীয় সহযোগীৰ সৈতে মিলি IEDৰে অৰ্ধ সামৰিক বাহিনীৰ ওপৰত আক্ৰমণৰ পৰিকল্পনা কৰিছিল ।

জম্মু-শ্ৰীনগৰ ৰাজপথত তদল দি থকা সুৰক্ষা বাহিনীৰ বিষয়ে খবৰ দিয়া আৰু জেইচ-এ-মহম্মদৰ সন্ত্ৰাসবাদীক নিজৰ গৃহত আশ্ৰয় দিয়া ৪ জন লোককো গ্ৰেপ্তাৰ কৰা হৈছিল । বাসগৃহত বিস্ফোৰক সামগ্ৰী মজুত ৰখাৰ অপৰাধত গ্ৰেপ্তাৰ কৰা হৈছিল শকিৰ বশ্বিৰ নামৰ এজন লোককো । আনহাতে আক্ৰমণত ব্যৱহৃত বাহন ক্ৰয় কৰা ছাজ্জাদ আহমেদ ভাটকো কৰায়ত্ত কৰা হৈছিল । ফেব্ৰুৱাৰী মাহৰ আৰম্ভণিতে ১৬০ কেজি আৰু ৪০ কেজি ওজনৰ দুটা IED প্ৰস্তুত কৰি সীমান্তৰে ভাৰতলৈ পঠিওৱা হৈছিল ।