কৃষক বিদ্ৰোহৰ অগনিয়ে চুইছে ৱাশ্বিংটন ডিচিৰ ভাৰতীয় দূতাবাস

ৱাশ্বিংটন ডিচি স্থিত ভাৰতীয় দূতাবাসৰ সমীপত প্ৰতিবাদ ৷ ভাৰতীয় কৃষক বিদ্ৰোহলৈ সমৰ্থন জনাই একাংশই আৰম্ভ কৰিছে এই প্ৰতিবাদ ৷ দাবী উঠিছে পৃথক খালিস্তান গঠনৰ ৷

ইন্টাৰনেশ্যনেল ডেস্ক, 27 জানুৱাৰী :ভাৰতীয় কৃষকৰ বাবে যুঁজ দিয়াৰ এয়া এক সুযোগ বুলি উল্লেখ কৰি খালিস্তানী বিচ্ছিন্নতাবাদী দলৰ সদস্যই আন কিছু সংখ্যকৰ সহযোগত নিউয়ৰ্ক আৰু ৱাশ্বিংটন ডি চি স্থিতি ভাৰতীয় দূতাবাসৰ বাহিৰত প্ৰতিবাদী সমদল উলিয়ায় ৷ দেশৰ কৃষিখণ্ডৰ ক্ষেত্ৰত নৰেন্দ্ৰ মোডী চৰকাৰে গৃহীত কৰা নতুন কৃষি আইনক সমালোচনা কৰি ইণ্ডিয়ান মিচনৰ সমুখত শিখ ডি এম ডি য়ুথ আৰু সংগতে প্ৰদৰ্শন কৰা প্ৰতিবাদত সমবেত হয় বহু সংখ্যক লোক ৷ বহু প্ৰতিবাদকাৰীয়ে গেৰুৱা বৰণৰ খালিস্তানী পতাকা উৰুওৱাৰ লগতে ভাৰত-বিৰোধী শ্ল’গান দিয়া পৰিলক্ষিত হয় ৷

ৱাশ্বিংটনৰ এগৰাকী প্ৰতিবাদকাৰী নৰেন্দৰ সিঙে এই নতুন নীতিয়ে ভাৰতৰ গণতন্ত্ৰ আৰু মানৱ অধিকাৰ খৰ্ব কৰা বুলি উল্লেখ কৰে ৷ নৰেন্দৰে কয় যে, ‘‘প্ৰতি বছৰে 26 জানুৱাৰী দিনটো আমি ক’লা দিৱস হিচাপে গণ্য কৰোঁ ৷ কিন্তু এইবাৰ সংহতিৰে ভাৰতীয় কৃষকৰ সৈতে ঠিয় দিছোঁ, যিসকল কেৱল শিখ নহয় বৰঞ্চ সমগ্ৰ দেশৰে ভিন্ন ধৰ্মৰ লোক ৷’’

প্ৰতিবাদকাৰী সকলৰ একাংশই পৃথক খালিস্তান ৰাষ্ট্ৰ প্ৰতিষ্ঠাৰ বাবে প্ৰায়েই আন্দোলন কৰি আহিছে ৷ প্ৰতিবছৰে তেওঁলোকে গণৰাজ্য দিৱস উদযাপন ম্লান কৰাৰ চেষ্টা কৰে যদিও এইবাৰ কৰ’ণা ভাইৰাছৰ বাবে ভাৰতীয় দূতাবাসে এই উদযাপন অনুষ্টুপীয়াকৈ কৰাৰ আগতীয়া সিদ্ধান্ত লৈছিল ৷ এমাহ পূৰ্বে ৱাশ্বিংটন ডিচিস্থিত ভাৰতীয় দূতাবাসৰ সমীপত থকা গান্ধীজীৰ প্ৰতিমূৰ্তিৰ ওপৰত খালিস্তানী পতাকা উৰুওৱা হৈছিল আৰু অনুৰূপ ধৰণৰ প্ৰতিবাদ সাব্যস্ত কৰা দেখা গৈছিল ৷ যাৰ বাবে ভাৰতীয় দূতাবাসৰ চৌপাশে নিৰাপত্তা ব্যৱস্থা অধিক কটকটীয়া কৰি তোলা হৈছিল ৷

উধাম সিঙে কয় যে, ‘‘আমি হিংসা নিবিচাৰোঁ ৷ কিন্তু ভাৰতীয় ৰাষ্ট্ৰযন্ত্ৰই যদি হিংসা বিচাৰে তেন্তে শিখসকলেও হিংসাৰ আশ্ৰয় ল’বলৈ বাধ্য হ’ব ৷’’ আমেৰিকা আৰু কানাডাৰ বহুকেইখন চহৰত এনে প্ৰতিবাদ বিগত দুমাহ ধৰি এনে প্ৰতিবাদ সাব্যস্ত কৰা দেখা গৈছে ৷

লগতে পঢ়ক :প্ৰতিবাদত উত্তপ্ত দিল্লী: আহত 86 গৰাকী আৰক্ষী