নিউজ ডেস্ক, ৯ জুলাই : বৃহস্পতিবাৰে পুৱা মধ্য প্ৰদেশৰ উজ্জেনৰ পৰা বিকাশ ডুবেক গ্ৰেপ্তাৰ কৰাৰ পিচতে কংগ্ৰেছ দলে উত্তৰ প্ৰদেশৰ যোগী আদিত্যনাথৰ চৰকাৰখনক বিভিন্ন প্ৰশ্নৰে থকাসৰকা কৰিছে । কংগ্ৰেছৰ সাধাৰণ সম্পাদক প্ৰিয়ংকা গান্ধী ভদ্ৰাই বৃহস্পতিবাৰে উক্ত বিষয় সন্দৰ্ভত চিবিআইৰ তদন্ত বিচাৰিছে ।
প্ৰিয়ংকা গান্ধী ভদ্ৰাই এক টুইটযোগে উল্লেখ কৰিছে যে, কানপুৰৰ জঘন্য হত্যাকাণ্ডৰ পিচত আদিত্যনাথৰ চৰকাৰে যেনেকুৱা তৎপৰভাবে তদন্ত কৰিব লাগিছিল সেয়া তদন্ত কৰা হোৱা নাই । কটকটীয়া নিৰাপত্তা থকাৰ পিচতো বিকাশ ডুবেই কেনেকৈ উজ্জেন পালে সেয়াও এক ডাঙৰ প্ৰশ্ন হৈ ৰৈছে ।
আৰক্ষী সূত্ৰই প্ৰকাশ কৰা অনুসৰি, বিকাশ ডুবেই ৰাতিপুৱা প্ৰায় ৮ বজাত উজ্জেনৰ মন্দিৰত উপস্থিত হৈছিল । মহাকাল মন্দিৰৰ বাহিৰত এজন সুৰক্ষা কৰ্মীয়ে ডুবেক দেখা পোৱাৰ লগতে তৎক্ষণাত আৰক্ষীৰ শীৰ্ষ বিষয়াক অবগত কৰে । উল্লেখযোগ্য যে, বিকাশ ডুবেই উত্তৰ প্ৰদেশৰ কানপুৰৰ চক্ৰ বিষয়া সহ ৮ গৰাকী আৰক্ষীক হত্যা কৰাৰ অভিযোগ উখাপন হৈছিল । উক্ত ঘটনাৰ পিচতে ডুবেৰ সন্ধানত আৰক্ষীয়ে হাৰিয়ানা, দিল্লী তথা ভাৰত-নেপাল সীমান্তত অভিযান অব্যাহত ৰাখিছিল ।
ইতিমধ্যে বিকাশ ডুবেৰ এখন ফটো ছ'চিয়েল মিডিয়াত ভাইৰেল হৈছে । য'ত দেখা পোৱা গৈছিল ডুবে উজ্জেন মন্দিৰৰ ভিতৰত এখন চোফাত বহি আছিল । আনহাতে, বিকাশ ডুবেৰ গ্ৰেপ্তাৰ সন্দৰ্ভত মধ্য প্ৰদেশৰ গৃহমন্ত্ৰী নৰোত্তম মিশ্ৰৰ অবদান থকা বুলি উল্লেখ কৰে ।
