হাথৰস গণধৰ্ষণঃ পিতৃক ঘৰত আবদ্ধ কৰি ৰাখি নিশাই পীড়িতাৰ মৃতদেহ সৎকাৰ আৰক্ষীৰ

মঙলবাৰে মাজনিশা হাথৰস গণধৰ্ষণ কাণ্ডৰ পীড়িতাৰ মৃতদেহ দিল্লীৰ পৰা চান্দপা থানা ক্ষেত্ৰৰ নিজ গাঁৱলৈ অনা হয় ৷ নিশা মৃতদেহৰ অন্তিম সৎকাৰ নকৰিবলৈ আত্মীয়ই আৰক্ষীক অনুৰোধ কৰাৰ পিছতো আৰক্ষীয়ে নিশাই মৃতদেহ সৎকাৰ কৰে ৷

নেশ্যনেল ডেক্স, 30 ছেপ্তেম্বৰঃ উত্তৰ প্ৰদেশৰ হাথৰস গণধৰ্ষণ পীড়িতাৰ মঙলবাৰে দিল্লীৰ সাফদৰগঞ্জত মৃত্যু হোৱাৰ পিছত নিশা মৃতদেহ নিজ বাসগৃহত উপস্থিত হয় ৷ গাঁওবাসী তথা আত্মীয়ৰ তীব্ৰ প্ৰতিবাদৰ মাজতে প্ৰশাসনে মৃতদেহৰ অন্তিম সৎকাৰ কৰে ৷ আনহাতে,পীড়িতাৰ পিতৃৰ অভিযোগ যে, দাহ কাৰ্যৰ সময়ত তেখতক ঘৰৰ ভিতৰত আবদ্ধ কৰি ৰাখিছিল আৰক্ষীয়ে ৷

মঙলবাৰে মাজনিশা পীড়িতাৰ মৃতদেহ দিল্লীৰ পৰা চান্দপা থানা ক্ষেত্ৰৰ নিজ গাঁৱলৈ অনা হয় ৷ নিশা মৃতদেহৰ অন্তিম সৎকাৰ নকৰিবলৈ আত্মীয়ই আৰক্ষীক অনুৰোধ কৰাৰ পিছতো আৰক্ষীয়ে নিশাই মৃতদেহ সৎকাৰ কৰে ৷ তথ্য অনুসৰি আৰক্ষীয়ে সৎকাৰস্থলীত পৰিয়ালৰো সকলো লোককে অহাৰ অনুমতি প্ৰদান কৰা নাছিল লগতে সাংবাদিককো বাধা আৰোপ কৰিছিল আৰক্ষীয়ে ৷

আনহাতে, পীড়িতাৰ পিতৃ ওম প্ৰকাশে কয় আৰক্ষীয়ে তেখেতকো নিজ কন্যাৰ অন্তিম সৎকাৰত অংশগ্ৰহণ কৰাৰ পৰা বিৰত ৰাখে ৷ আনকি তেখেতক নিজৰ ঘৰত বন্দী কৰি ৰাখে আৰক্ষীয়ে ৷ ইয়াৰ বিপৰীতে পৰিয়ালৰ সহযোগত পীড়িতাৰ অন্তিম সৎকাৰ সুকলমে সম্পন্ন কৰা হয় ৷ সমগ্ৰ চহৰতে শান্তি ব্যৱস্থা অব্যাহত আছে বুলি সাংবাদিকৰ আগত মন্তব্য কৰে জইন্ট মেজিষ্ট্ৰেট প্ৰেম প্ৰকাশ মীনাই ৷

লগতে পঢ়ক-গিলগিট বাল্টিস্তানৰ নিৰ্বাচনক লৈ পাকিস্তানক সমালোচনা ভাৰতৰ