নেশ্যনেল ডেস্ক, 11 জানুৱাৰী :শনিবাৰে দুদিনীয়া ভ্ৰমণৰে পশ্চিমবংগত উপস্থিত হ'ব প্ৰধানমন্ত্ৰী নৰেন্দ্ৰ মোডী ৷ নাগৰিকত্ব সংশোধনী আইনক (CAA) লৈ পশ্চিমবংগত উত্তাল প্ৰতিবাদ সাব্যস্ত হৈ থকাৰ সময়তে প্ৰধানমন্ত্ৰী গৰাকীয়ে ভ্ৰমণ কৰিব পশ্চিমবংগ ৷ প্ৰধানমন্ত্ৰীৰ ভ্ৰমণকলৈ সুৰক্ষা ব্যৱস্থা কটকটীয়া কৰি তোলা হৈছে বুলি জানিব পৰা গৈছে ৷
বহুকেইটা বাওঁপন্থী সংগঠনে প্ৰধানমন্ত্ৰী মোডীৰ ভ্ৰমণকলৈ প্ৰতিবাদ সাব্যস্ত কৰাৰ লগতে ক'লা পতাকা প্ৰদৰ্শন কৰিব বুলি ইতিমধ্যেই ঘোষণা কৰিছে ৷
এই সম্পৰ্কত চৰকাৰী তথ্যই জানিবলৈ দিয়ে, "আমি প্ৰধানমন্ত্ৰী গৰাকীৰ ভ্ৰমণকলৈ সকলো ধৰণৰ সুৰক্ষা ব্যৱস্থা কটকটীয়া কৰি তুলিছো ৷ সেয়েহে শনিবাৰে বিয়লি বিমান বন্দৰৰ পৰা তেওঁৰ যোৱা পথত বেৰিকেড নিৰ্মান কৰা হৈছে ৷ সেই সময়ছোৱাত অতিৰিক্ত সুৰক্ষা ব্যৱস্থাৰো যোগাৰ কৰা হৈছে ৷"
উল্লেখ্য যে, যোৱা মাহৰ পৰা CAA ৰ বিৰোধিতাৰে সমগ্ৰ ৰাজ্যখন প্ৰতিবাদত উত্তাল হৈ আছে ৷ প্ৰতিবাদকাৰীয়ে ৰেলৱে' সম্পত্তি ধ্বংস কৰাৰ লগতে বাহনত অগ্নি সংযোগ আৰু ৰাস্তা-পথ আৱদ্ধ কৰি ৰাখিছিল ৷
পশ্চিমবংগৰ মুখ্যমন্ত্ৰী মমতা বেনাৰ্জীয়ে পূৰ্বৰ পৰাই মন্তব্য কৰি আহিছে যে, তেওঁ নিজৰ ৰাজ্যত CAA কাৰ্যকৰী হ'বলৈ নিদিয়ে ৷