নেশ্যনেল ডেস্ক, 5 জুন : লক ডাউনৰ মাজতে বিভিন্ন ধৰণৰ অনুষ্ঠান-প্ৰতিষ্ঠান পুনৰ মুকলি কৰা সন্দৰ্ভত তেলেংগানা চৰকাৰে জাৰী কৰিছে বিশেষ নিৰ্দেশনা ৷ কেন্দ্ৰীয় গৃহ মন্ত্ৰণালয়ে বিগত 30 মে'ত প্ৰকাশ কৰা "আনলক 1.0" ৰ নিৰ্দেশনাৰ ভিত্তিত তেলেংগানা চৰকাৰে প্ৰস্তুত কৰি উলিয়াইছে ৰাজ্যখনৰ "আনলক 1.0" নিৰ্দেশনাৱলী ৷ উক্ত নিৰ্দেশনা অনুসৰি, অহা 8 জুনৰ পৰা পুনৰ খোলা হ'ব শ্বপিং ম'ল, হোটেলকে ধৰি ধৰ্মীয় উপাসনাস্থলী সমূহ ৷ ইয়াৰ মাজতো থাকিব কিছু বিশেষ নিৰ্দেশনা ৷
উল্লেখ্য যে, কন্টেইনমেন্ট জ'ন সমূহৰ বাহিৰে সকলো ঠাইতে দোকান-পোহাৰ তথা অন্যান্য সকলো ব্যৱসায়ীক প্ৰতিষ্ঠান খোলাৰ অনুমতি প্ৰদান কৰিছে তেলেংগানা চৰকাৰে ৷ চৰকাৰী নিৰ্দেশনা অনুসৰি, ছবি গৃহ আৰু গেমিং কেন্দ্ৰ সমূহৰ বাহিৰে সকলো ব্যৱসায়িক প্ৰতিষ্ঠান আৰু ধৰ্মীয় উপাসনাস্থলী 8 জুনৰ পৰা মুকলি কৰিব পাৰিব ৷ কিন্তু ইয়াৰ বাবে চৰকাৰে নিৰ্ধাৰণ কৰি দিছে নিৰ্দিষ্ট সময় ৷ লগতে সকলো শিক্ষানুষ্ঠান, মেট্ৰ' ৰেল, শৰীৰ চৰ্চা কেন্দ্ৰ, উদ্যান, বাৰ, আৰু সামাজিক, ৰাজনৈতিক, সাংস্কৃতিক তথা ধৰ্মীয় অনুষ্ঠানৰ ক্ষেত্ৰত পূৰ্বৰ দৰেই বাহাল থাকিব নিষেধাজ্ঞা ৷ অৰ্থাৎ এই সমূহ স্থান খোলাৰ বাবে তথা অনুষ্ঠান আয়োজনৰ ক্ষেত্ৰত অনুমতি প্ৰদান কৰা নাই তেলেংগানা চৰকাৰে ৷