নিউজ ডেস্ক, ৩১ মে' :লকডাউনৰ মাজতে 'মন কি বাত' অনুষ্ঠানৰ জৰিয়তে তৃতীয়বাৰৰ বাবে দেশবাসীক সম্বোধন প্ৰধানমন্ত্ৰী নৰেন্দ্ৰ মোডীৰ । দেশবাসীক সম্বোধন কৰি কৰ'ণা মহামাৰীৰ ফলত প্ৰব্ৰজনকাৰী শ্ৰমিক আৰু দৰিদ্ৰ লোকসকল আটাইতকৈ বেছি ক্ষতিগ্ৰস্ত হৈছে বুলি মন্তব্য কৰে প্ৰধানমন্ত্ৰীয়ে ।
কেন্দ্ৰীয় তথা সকলো ৰাজ্যৰ চৰকাৰে প্ৰব্ৰজনকাৰী শ্ৰমিকসকলক সহায়ৰ বাবে কাম কৰি আছে । বিশেষকৈ বিভিন্ন ৰাজ্যত আৱদ্ধ হৈ থকা শ্ৰমিকসকলৰ বাবে ৰেল বিভাগে বিশেষ ব্যৱস্থা গ্ৰহণ কৰাৰ কথা উল্লেখ কৰে প্ৰধানমন্ত্ৰী নৰেন্দ্ৰ মোডীয়ে । দেশত ক্ৰমাৎ অৰ্থনৈতিক কাম-কাজ স্বাভাৱিক হোৱাৰ সময়ত সকলোৱে অধিক সতৰ্ক হ'ব লাগিব বুলি মন্তব্য কৰে মোডীয়ে । সকলোকে সামাজিক দুৰত্ব মানি চলাৰ বাবে অনুৰোধ জনোৱাৰ লগতে মাস্ক পিন্ধি থাকিবলৈ আহ্বান জনায় প্ৰধানমন্ত্ৰীগৰাকীয়ে ।
ইয়াৰ উপৰিও, দেশৰ দৰিদ্ৰ লোকসকলৰ স্বাৰ্থত কেন্দ্ৰীয় চৰকাৰে লকডাউন শেষ কৰাৰ সিদ্ধান্ত গ্ৰহণ কৰিছে বুলি প্ৰধানমন্ত্ৰীয়ে উল্লেখ কৰে । লকডাউন শেষ কৰি জনজীৱন লাহে লাহে স্বাভাৱিক কৰাৰ পদক্ষেপ হাতত লোৱা হৈছে যদিও দেশত বৰ্তমানেও কৰ'ণাৰ বিপদ হ্ৰাস পোৱা নাই । সম্প্ৰতি সমগ্ৰ দেশে এক কঠিন পৰীক্ষাত অৱতীৰ্ণ হৈছে । এই সংকটৰ সময়ত সকলোৱে সতৰ্কতা অৱলম্বন কৰাৰ বাদে একো বিকল্প নাই বুলি মন্তব্য কৰে প্ৰধানমন্ত্ৰীয়ে ।
কিন্তু, বিশ্বৰ অন্য ৰাজ্যৰ তুলনাত কোভিড-১৯ৰ সৈতে মোকাবিলা কৰাৰ ক্ষেত্ৰত দেশ বহুত আগত আছে বুলি উল্লেখ কৰে নৰেন্দ্ৰ মোডীয়ে । এইপৰ্যন্ত ১ লাখ ৮৩ হাজাৰৰো অধিক লোক এই ভাইৰাছত আক্ৰান্ত হৈছে যদিও মৃত্যুৰ হাৰ কম । সেয়ে সমগ্ৰ বিশ্বই কৰ'ণাৰ মোকাবিলাৰ ক্ষেত্ৰত ভাৰতৰ ওপৰত দৃষ্টি ৰাখিছে বুলি 'মন কি বাত' অনুষ্ঠানত উল্লেখ কৰে প্ৰধানমন্ত্ৰী নৰেন্দ্ৰ মোডীয়ে ।
