নেশ্যনেল ডেস্ক, 4 ডিচেম্বৰ : নৌসেনা দিৱসৰ শুভক্ষণত বুধবাৰে দেশৰ প্ৰধানমন্ত্ৰী নৰেন্দ্ৰ মোডীয়ে নৌসেনাৰ সাহসী কৰ্মীসকলক তেওঁলোকৰ সেৱা আৰু ত্যাগৰ বাবে অভিবাদন দিয়ে ৷ 83 ছেকেণ্ডৰ এটা ভিডিঅ' টুইট কৰি প্ৰধানমন্ত্ৰীগৰাকীয়ে কয়, "নৌসেনা দিৱসৰ এই শুভক্ষণত আমি সাহসী নৌকৰ্মীসকলক শ্ৰদ্ধাৰে সোঁৱৰো ৷ তেওঁলোকৰ সেৱা আৰু ত্যাগৰ ফলতে আমাৰ দেশ শক্তিশালী আৰু সুৰক্ষিত হ'বলৈ সক্ষম হৈছে ৷"
প্ৰধানমন্ত্ৰীগৰাকীৰ পূৰ্বে ৰাষ্ট্ৰপতি ৰাম নাথ কোবিন্দেও নৌসেনা বিভাগৰ সকলো কৰ্মচাৰীলৈ শুভেচ্ছা প্ৰেৰণ কৰে ৷ কোবিন্দে টুইটাৰৰ জৰিয়তে কয়, "নৌসেনা দিৱসত বিভাগটোৰ বিষয়া তথা পুৰুষ আৰু মহিলা কৰ্মচাৰীসকললৈ শুভেচ্ছা জ্ঞাপন কৰিছো ৷ সামুদ্ৰিক সীমা, ব্যৱসায়িক পথ, জৰুৰীকালিন অৱস্থাত সহায়ৰ বাবে সাজু হৈ থকা এই বীৰসকলৰ দায়বদ্ধতাকলৈ সমগ্ৰ দেশ গৰ্বিত ৷ আপোনালোকে সদায় পানীত ৰাজত্ব কৰি থাকক ৷ জয় হিন্দ !"