আজি সন্ধিয়া 6.40 বজাত হ'ব উদ্ধৱ থাকৰেৰ শপত গ্ৰহণ

মহাৰাষ্ট্ৰ মুখ্যমন্ত্ৰী পদত অধিষ্ঠিত হ'ব শিৱসেনা প্ৰধান উদ্ধৱ থাকৰে ৷ শিৱাজী পাৰ্কত সন্ধিয়া অনুষ্ঠিত হ'ব শপত গ্ৰহণ অনুষ্ঠান ৷

নিউজ ডেস্ক,28 নৱেম্বৰ : আজি মহাৰাষ্ট্ৰৰ মুখ্যমন্ত্ৰী হিচাপে শপত গ্ৰহণ কৰিব শিৱসেনাৰ প্ৰধান উদ্ধৱ থাকৰেই ৷ মুম্বাইৰ দাদৰস্থিত শিৱাজী পাৰ্কত সন্ধিয়া অনুষ্ঠিত হ'ব শপত গ্ৰহণ অনুষ্ঠান ৷ শিৱসেনা, এন চি পি আৰু কংগ্ৰেছেৰ ‘মহা বিকাশ অঘড়ী’ মিত্ৰজোঁটৰ উদ্ধৱ থাকৰেয়ে মহাৰাষ্ট্ৰৰ মুখ্যমন্ত্ৰী হিচাপে শপতগ্ৰহণ কৰিব ৷ মঙলবাৰে মহাৰাষ্ট্ৰৰ ৰাজ্যপাল ভগত সিং ক’চিয়াৰিয়ে এখন পত্ৰ যোগে কয় যে, মৌখিক অনুৰোধ অনুসৰি 28 নৱেম্বৰ(বৃহস্পতিবাৰ)ৰ সন্ধিয়া 6.40 বজাত উদ্ধৱ থাকৰেক মুখ্যমন্ত্ৰী পদ আৰু গোপনীয়তাৰ শপত দিয়া হ'ব ৷ ইয়াৰ পূৰ্বে মঙলবাৰে এনচিপি, কংগ্ৰেছ আৰু শিৱসেনাৰ বিধায়কসকলে উদ্ধৱ থাকৰেক নিজৰ নেতা ঘোষণা কৰি ৰাজ্যপাল ক’চিয়াৰিক এখন পত্ৰ প্ৰেৰণ কৰিছিল ৷ তাৰ পাছতে ক’চিয়াৰিয়ে শপত গ্ৰহণৰ বাবে নিদেৰ্শ জাৰি কৰে ৷ ইয়াৰ মাজতে বম্বে হাই-কৰ্টে শপত গ্ৰহণ অনুষ্ঠানক লৈ শিৱাজী পাৰ্কৰ নিৰাপত্তা কটকটীয়া কৰাৰ নিদেৰ্শ জাৰি কৰাৰ লগতে এনেধৰণৰ অনুষ্ঠানৰ বাবে পুনৰ এনে ৰাজহুৱা স্থান ব্যৱহাৰ নকৰিবলৈ নিদেৰ্শ প্ৰদান কৰে ৷ ইফালে নৱনিৰ্বাচিত বিধায়কসকলে বুধবাৰে বিধানসভাত ৰাজ্যপাল ভগৎ সিং ক’চিয়াৰিৰ উপস্থিতিত শপতগ্ৰহণ কৰে ৷ শপতবাক্য পঢ়োৱাই নৱনিযুক্ত অন্তৱৰ্তীকালীন অধ্যক্ষ কালিদাস কলাম্বকাৰে৷ মহাৰাষ্ট্ৰত চলি থকা ৰাজনৈতিক অস্থিৰতাৰ বাবে নিৰ্বাচনৰ এমাহ পিছতো শপতগ্ৰহণ কৰিব পৰা নাছিল নৱ-নিৰ্বাচিত বিধায়কসকলে ৷

উল্লেখ্য যে, বুধবাৰে পৃথকে পৃথকে কংগ্ৰেছ সভাপতি ছোনীয়া গান্ধী আৰু প্ৰাক্তন প্ৰধান মন্ত্ৰী মনমোহন সিঙক শপত গ্ৰহণ অনুষ্ঠানলৈ আমন্ত্ৰণ জনায় শিৱসেনা প্ৰধান উদ্ধৱ থাকৰেয়ে ৷

লগতে পঢ়ক:28 নৱেম্বৰৰ পৰা অসম বিধানসভাৰ শীতকালীন অধিবেশন