বিগত বৰ্ষৰ আগষ্টত জম্মু আৰু কাশ্মীৰ সন্দৰ্ভত লোৱা সিদ্ধান্তৰ প্ৰতি (পূৰ্বতে থকা বিশেষ ৰাজ্যৰ মৰ্যাদা বিলোপ কৰি জম্মু-কাশ্মীৰক দুখন পৃথক কেন্দ্ৰীয়শাসিত অঞ্চল হিচাপে ভাগ কৰা হয়) আন্তঃৰাষ্ট্ৰীয় পৰ্যায়ৰ প্ৰতিক্ৰিয়াবোৰক কেন্দ্ৰীয় চৰকাৰে গুৰুত্ব প্ৰদান কৰা নাছিল যদিও সদ্যহতে নতুন দিল্লীৰ কেন্দ্ৰীয় চৰকাৰখনে সূক্ষ্মভাৱে ইয়াৰ নীতিসমূহ সলনি কৰি আছে । কাশ্মীৰত নিৰাপত্তা বেষ্টনীৰ মাজত এক অচলাৱস্থাই বিৰাজ কৰা প্ৰায় পাঁচ মাহ অতিক্ৰম কৰিলে আৰু লাহে লাহে বাধা-নিষেধবোৰ আঁতৰাবলৈ আৰম্ভ কৰা হৈছে । প্ৰায় পাঁচ মাহ ধৰি অপ্ৰত্যাশিত ইন্টাৰনেট সেৱা বন্ধ হৈ থকাৰ পাছত সীমাবদ্ধতাৰে আংশিকভাৱে ইণ্টাৰনেট সেৱা আৰম্ভ কৰা হৈছে ।
কূটনীতিবিদৰ ভ্ৰমণঃ
অলপতে ভাৰত চৰকাৰে দিল্লীস্থ বিদেশী কূটনীতিবিদসকলক কাশ্মীৰৰ সমাজৰ বিভিন্ন স্তৰৰ লোকৰ সৈতে সাক্ষাৎ কৰোৱাৰ উদ্দেশ্যে এক ভ্ৰমণৰ আয়োজন কৰে । আমেৰিকা যুক্তৰাষ্ট্ৰ, বাংলাদেশ, ভিয়েটনাম, নোৰৱে, মালদ্বীপ, দক্ষিণ কোৰিয়া, মৰক্কো, নাইজেৰিয়া, আৰ্জেণ্টিনা,ফিলাপাইনছ আদি দেশৰ কূটনীতিবিদসকলক কেন্দ্ৰীয় শাসিত অঞ্চলটোলৈ এই ভ্ৰমণত লৈ যোৱা হৈছিল ।
নিৰ্দিষ্ট কিছুসংখ্যক সাংবাদিক, ৰাজনৈতিক নেতা আৰু ৰাজহুৱা কৰ্মীৰ সৈতেহে কূটনীতিবিদসকলক বাৰ্তালাপ কৰিবলৈ অনুমতি দিয়া হৈছিল । প্ৰত্যাশিতভাৱে তেওঁলোকক কাশ্মীৰৰ হাই-প্ৰফাইল ৰাজনৈতিক বন্দী বা কোনো ৰাজনৈতিক কাৰাবাসীক লগ কৰিবলৈ দিয়া হোৱা নাছিল । তেওঁলোকে সাক্ষাৎ কৰা অধিকাংশ লোকে কাশ্মীৰক শান্ত বুলি দাবী কৰাৰ লগতে আগষ্টৰ পৰা এটাও গুলী ফুটোৱা হোৱা নাই বুলি জানিবলৈ দিয়ে । একেখিনি কথাকে নতুন দিল্লীয়ে তেওঁলোকৰ কাশ্মীৰ নীতিৰ ন্যায্যতা প্ৰদান কৰিবলৈ কৈ আহিছে ।
কেন্দ্ৰীয় চৰকাৰৰ কিছুসংখ্যক মন্ত্ৰীয়ে শীঘ্ৰে কাশ্মীৰ ভ্ৰমণ কৰিব বুলিও চৰকাৰে অলপতে ঘোষণা কৰিছিল । নতুনকৈ সৃষ্টি কেন্দ্ৰীয়শাসিত অঞ্চল দুটাত কেন্দ্ৰই গ্ৰহণ কৰা উন্নয়নমূলক পদক্ষেপবোৰৰ বিষয়ে তেওঁলোকে ৰাইজক জনাব ।
এয়া সঁচাকৈয়ে সময়োচিত পদক্ষেপ । কূটনীতিবিদসকলৰ ভ্ৰমণৰ লগতে মন্ত্ৰীসকলৰ ভ্ৰমণৰ দ্বাৰা কাশ্মীৰৰ পৰিস্থিতি যে স্বাভাৱিক হ’বলৈ ধৰিছে তাক প্ৰতীয়মান কৰাৰ চেষ্টা কৰা হৈছে । ইয়াতে প্ৰশ্ন উত্থাপন হয়, কিয় চৰকাৰে লৈ যোৱা কূটনীতিবিদসকলক চৰকাৰে নিৰ্দিষ্ট কৰা কেইজনমান মাত্ৰ বিশেষ লোকৰ সৈতেহে সাক্ষাৎ কৰাৰ বাবে লৈ যোৱা হৈছিল? যদি বিদেশী প্ৰতিনিধিসকলক কাশ্মীৰৰ ভ্ৰমণৰ অনুমতি দিয়া হয়, ভাৰতীয়া ৰাজনীতিবিদসকলক কিয় নিজৰ দেশৰেই এটা অঞ্চলত প্ৰৱেশ কৰিবলৈ অনুমতি দিয়া নহয়? যদিহে চৰকাৰৰ উদ্দেশ্য কাশ্মীৰৰ লোকসকলৰ কাষ চপা, তেন্তে ২০১০ চনত কাশ্মীৰ উপত্যকাত ভাৰতবিৰোধী আন্দোলন গঢ়ি উঠা সময়ত কৰাৰ দৰে সৰ্ব দলীয় প্ৰতিনিধিৰ কাশ্মীৰ ভ্ৰমণৰ ব্যৱস্থা চৰকাৰে নকৰে কিয়? এনেবোৰ উপায়ৰ জৰিয়তে চৰকাৰে কাশ্মীৰত স্বাভাৱিক অৱস্থা প্ৰত্যাৱৰ্তন কৰা বুলি ছায়াছবি আঁকিব বিচাৰিছে । কিন্তু আমি জ্ঞাত যে কাশ্মীৰৰ ছবিখনত ক’তো স্বাভাৱিক অৱস্থা নাই । যদি স্বাভাৱিক অৱস্থা ঘূৰাই আনিব বিচৰা হয় তেন্তে কাশ্মীৰত স্বাভাৱিক ৰাজনীতি কৰিবলৈও অনুমতি দিব লাগিব ।
প্ৰচেষ্টাসমূহৰ সময়ঃ
কাশ্মীৰত বাধা-নিষেধ নৰম কৰাৰ বাবে গ্ৰহণ কৰা কিছুমান পদক্ষেপ অলপতে উচ্চতম ন্যায়ালয়ে প্ৰদান কৰা এক নিৰ্দেশৰ ভিত্তিত গ্ৰহণ কৰা হৈছে । এই নিৰ্দেশত ন্যায়ালয়ে কৈছে যে অনিৰ্দিষ্টকালীনভাৱে ইন্টাৰনেট সেৱা বন্ধ ৰখাটো অনৈতিক আৰু ক্ষমতাৰ অপব্যৱহাৰ । যদিও এই নিৰ্দেশত সকলো সঠিক শব্দ ব্যৱহাৰ কৰা হৈছিল তথাপি ই কাশ্মীৰৰ জনসাধাৰণক স্বস্তি প্ৰদান কৰিব নোৱাৰে । কিয়নো আদালতে চৰকাৰক কাশ্মীৰত জাৰি কৰা বাধা-নিষেধসমূহ আঁতৰ কৰিবলৈ নহয়, এইসমূহৰ বিষয়ে পৰ্যালোচনা কৰিবলৈহে নিৰ্দেশ দিছে । আদালতৰ নিৰ্দেশটোৰ সৈতে জড়িত থকা সমস্যাটো হ’ল চৰকাৰে ভালদৰে পৰ্যালোচনা বা পুনৰীক্ষণ কৰিব পাৰে আৰু একেই ব্যৱস্থা অব্যাহত ৰাখিব পাৰে ।