নেশ্যনেল ডেস্ক, 5 অক্টোবৰঃ দেওবাৰে পুৱা সেনা প্ৰধান জেনেৰেল মনোজ মুকুণ্ড নাৰাৱানে আৰু বৈদেশিক সচিব হৰ্ষবৰ্ধন শ্ৰীংগলাই সেনা আৰু পৰিকল্পনা সম্বন্ধীয় এক গুৰুত্বপূৰ্ণ আলোচনাৰ বাবে দুদিনীয়া ভ্ৰমণসূচীৰে ম্যানমাৰৰ ৰাজধানী নেপীটাওত উপস্থিত হৈছিল ৷ এই ভ্ৰমণ কাৰ্যসূচীৰ সময়চোৱাতেই উত্তৰ-পূৱৰ যুটীয়া বিদ্ৰোহী সংগঠনৰ এটি দলে অৰুণাচল প্ৰদেশৰ চাংলাঙত অসম ৰাইফলছৰ বাবে পানী কঢ়িয়াই নিয়া ট্ৰাকৰ ওপৰত আক্ৰমণ চলায় ৷
এই আক্ৰমণত অসম ৰাইফলছৰ এজন জোৱান নিহত হোৱাৰ বিপৰীতে আন এজন জোৱান গুৰুতৰভাৱে আহত হৈছে ৷ এই আক্ৰমণৰ দায়িত্ব স্বীকাৰ কৰিছে উত্তৰ-পূৱৰ দুটাকৈ প্ৰধান বিদ্ৰোহী সংগঠনে ৷ এটা হ’ল পৰেশ বৰুৱাৰ নেতৃত্বাধীন সংযুক্ত মুক্তি বাহিনী অসম(ULFA) খাপলাঙৰ নেতৃত্বাধীন এন.এচ.চি.এন(কে) ৷
2019 বৰ্ষৰ জানুৱাৰী-ফেব্ৰুৱাৰী মাহৰ পৰা ম্যানমাৰৰ চাগাইংত ‘তাতমাদাও’ বা ম্যানমাৰ সেনাই বিদ্ৰোহী সংগঠনকেইটাৰ মূল ঘাটিত আক্ৰমণ চলোৱাৰ পিছতেই প্ৰায়ে নিস্ক্ৰিয় হৈ আছিল উত্তৰ-পূৱৰ বিদ্ৰোহী সংগঠনসমূহ ৷ দেওবাৰৰ আক্ৰমণৰ আৰম্ভণি IED বিষ্ফোৰণৰ দ্বাৰা হয় আৰু ইয়াৰ পিছতেই স্বয়ংচালিত বন্দুকৰ দ্বাৰা গুলিবৰ্ষণ কৰা হয় ৷
ইয়াৰ তাৎক্ষণিক কাৰণ এইটো হ’ব বুলি সম্ভাৱনা প্ৰকাশ কৰা হৈছে যে, ভাৰত-ম্যানমাৰ আলোচনাৰ সমান্তৰালকৈ, পশ্চিম অঞ্চলত প্ৰকৃত নিয়ন্ত্ৰণ ৰেখাত তথা মেকমোহন লাইনত ভাৰত-চীন সৈন্যৰ মাজত বৃদ্ধি পোৱা উত্তেজনাময় পৰিস্থিতিৰ বাবে এই বিদ্ৰোহী সংগঠনসমূহেও উৎসাহ লাভ কৰিছে ৷