নেশ্য়নেল ডেস্ক, 4 মে' : কৰ্নেল আশুতোষ শৰ্মাৰ পত্নী পল্লবী শৰ্মাই মন্তব্য কৰে যে, স্বামীৰ ত্যাগে প্ৰমাণ কৰিলে যে, তেওঁ ভাৰতীয় সেনা বাহিনীৰ পোচাক পৰিধান কৰাৰ যোগ্য আছিল ৷
কাশ্মীৰৰ হিন্দৱাৰাত 3 মে'ত সন্ত্ৰাসবাদীৰ সৈতে যুঁজত শ্বহীদ হোৱা আশুতোষ শৰ্মাৰ পত্নীয়ে ইটিভি ভাৰতক কয়, "দেশক সেৱা কৰা আৰু ভাৰতীয় সেনা বাহিনীৰ পোচাক পৰিধান কৰা তেওঁৰ সপোন আছিল ৷ এই পোচাকযোৰৰ বাবে তেওঁ বহু কষ্ট স্বীকাৰ কৰিছে ৷ 20 বছৰৰ সেৱাকালত তেওঁ প্ৰতিবাৰেই নিজক প্ৰমাণ কৰিছে ৷ এইবাৰো তেওঁ প্ৰমাণ কৰিছে যে, সেনাৰ পোচাক পৰিধানৰ তেওঁ যোগ্য আছিল ৷"
তেওঁ এই ঘটনাৰ পূৰ্বানুমান কৰিছিল নেকি বুলি সোধাত পল্লবীয়ে কয়, "মই যেতিয়া তেওঁৰ সৈতে বহু সময়ৰ বাবে যোগাযোগ স্থাপন কৰিব পৰা নাছিলো, তেতিয়া কিবা অঘটন হৈছিল বুলি চিন্তিত হৈছিলো ৷ পুৱা 9 বজাত মই তেওঁৰ মৃত্যুৰ খবৰ লাভ কৰিলো ৷"
স্বামী সম্পৰ্কত পল্লবীয়ে কয়, "কৰ্নেল শৰ্মাই সদায় নেতৃত্ব প্ৰদান কৰি ভাল পায় ৷ নিজৰ কথা চিন্তা কৰাৰ পূৰ্বে তেওঁ নিজৰ জোৱানসকলৰ সুৰক্ষাক লৈ সদায় দায়বদ্ধ ৷"
16 বছৰ পূৰ্বে আশুতোষ শৰ্মাৰ সৈতে বিবাহপাশত আৱদ্ধ হোৱা পল্লবীয়ে কয়, "মই সদায় চিন্তিত আছিলো যে, এনেকুৱা ঘটনা সংঘটিত হ'ব ৷ ইয়াৰ পূৰ্বেও তেওঁ এনে অভিযান সম্পূৰ্ণ কৰিছে কিন্তু এইবাৰ সকলো পৃথক আছিল ৷"
কৰ্নেল শৰ্মা সম্পৰ্কত তেওঁৰ জ্যেষ্ঠ ভাতৃ পিয়ুষে কয়, "আশুতোষে সেনাবাহিনীত যোগদানৰ বাবে অশেষ চেষ্টা কৰিছিল আৰু 13 সংখ্য়ক প্ৰয়াসত সফল হৈছিল ৷"
উল্লেখ্য যে, আশুতোষ শৰ্মা ভাৰতীয় সেনাৰ 21 সংখ্যক ৰাষ্ট্ৰীয় ৰাইফলছ ইউনিটৰ কৰ্নেল আছিল ৷ দুবাৰকৈ তেওঁ সাহসিকতাৰ বাবে সন্ত্ৰাসবাদী নিৰ্মূল মিছনৰ গেলান্ট্ৰী মেডেল লাভ কৰিছিল ৷ ইয়াৰোপৰি, সন্ত্ৰাসবাদীৰে সৈতে যুঁজত যোৱা পাঁচ বছৰত মৃত্যুবৰণ কৰা প্ৰথমজন কমাণ্ডিং অফিচাৰ অথবা কৰ্নেল ৰেংকৰ সেনা বিষয়া হিচাপে চিহ্নিত হৈছে আশুতোষ শৰ্মা ৷
এক সন্ত্ৰাসবাদীয়ে কাপোৰৰ তলত গ্ৰেনেড লুকুৱাই গৈ থকাৰ সময়তে শৰ্মাই সন্ত্ৰাসবাদীজনক গুলীয়াই হত্যা কৰাৰ লগতে নিজৰ দল আৰু জম্মু-কাশ্মীৰ আৰক্ষীৰ প্ৰাণ ৰক্ষা কৰিছিল ৷ সেয়েহে কমাণ্ডিং অফিচাৰ হিচাপে গেলান্ট্ৰী মেডেল লাভ কৰিছিল আশুতোষ শৰ্মাই ৷
তেওঁৰ উপৰি হিন্দৱাৰা অভিযানত মেজৰ অনুজ চুড, নায়ক ৰাজেষ আৰু লেঞ্চনায়ক দিনেশে প্ৰাণ হেৰুৱাইছিল ৷ ইয়াৰোপৰি, দুজনকৈ সন্ত্ৰাসবাদীও হিন্দৱাৰাত নিহত হৈছিল ৷
