টুইটাৰৰ এখন ফটোঃ বিপদত বিবেক অবেৰয়

বিবেক অবেৰয়ৰ বিৰুদ্ধে এজাহাৰ দাখিলৰ আহ্বান মুম্বাই মহিলা কংগ্ৰেছৰ । তেওঁৰ এনে কাৰ্যই সকলো মহিলাকে অপমান কৰিছে বুলি প্ৰকাশ কৰিছে মুম্বাই মহিলা কংগ্ৰেছে ।

মুম্বাই, ২১ মে': শেহতীয়াকৈ টুইটাৰত নিৰ্বাচনী কেন্দ্ৰিক এটা মীম শ্বেয়াৰ কৰি কেন্দ্ৰীয় মহিলা আয়োগৰ ৰোষত পৰে বলীউডৰ অভিনেতা বিবেক অবেৰয় । আনহাতে, মঙলবাৰে মুম্বাই মহিলা কংগ্ৰেছে অভিনেতাগৰাকীৰ বিৰুদ্ধে ভাৰতীয় দণ্ডবিধি আইনৰ ৫০৯ নং ধাৰাৰ অধীনত গোচৰ ৰুজু কৰাৰ আহ্বান জনায় আৰক্ষীক । মুম্বাই মহিলা কংগ্ৰেছে প্ৰকাশ কৰা অনুসৰি এই ফটোখনৰ জৰিয়তে বিবেক অবেৰয়ে মহিলাৰ বিষয়ে অপ্ৰিয় মন্তব্য কৰাৰ লগতে সকলো মহিলাকে অপমান কৰিছে ।

সোমবাৰে অভিনেতাগৰাকীয়ে ঐশ্বৰ্য ৰায়ৰ ব্যক্তিগত জীৱনক সাঙুৰি প্ৰস্তুত কৰা মীমটো শ্বেয়াৰ কৰাৰ পাচতেই বিভিন্ন মহলে এই সন্দৰ্ভত বিৰূপ প্ৰতিক্ৰিয়া প্ৰকাশ কৰিছিল । অৱশেষত, এই মীমটো আঁতৰাই বিবেক ক্ষমা খোজে যদিও তেওঁৰ এনে কাৰ্যত এতিয়াও ক্ষোভিত হৈ আছে একাংশ ।