নিউজ ডেস্ক,12 অক্টোবৰ :ভাৰতৰ প্ৰধানমন্ত্ৰী নৰেন্দ্ৰ মোদী আৰু চীনৰ ৰাষ্ট্ৰপতি ঝি জিনপিঙৰ মাজত অনুষ্ঠিত হৈ থকা অনানুষ্ঠানিক শীৰ্ষ সন্মিলনৰ শনিবাৰে দ্বিতীয় দিন ৷ এই দ্বিতীয় দিনা দুয়োগৰাকী শীৰ্ষ নেতাই চেন্নাইৰ সমুদ্ৰতীৰত অৱস্থিত মামাল্লাপুৰ চহৰত এখন প্ৰতিনিধি পৰ্যায়ৰ বৈঠকত মিলিত হয় ৷
ভাৰতৰ প্ৰধানমন্ত্ৰী নৰেন্দ্ৰ মোদী আৰু চীনৰ ৰাষ্ট্ৰপতি জি জিন পিঙৰ মাজত অতি গুৰুত্বপূৰ্ণ বৈঠক বৈদেশিক সচিব বিজয় কে গোখলেই জনোৱা মতে, এই বৈঠকত আন্তৰ্জাতিক আৰু আঞ্চলিক বিষয়সমূহৰ ওপৰত আলোচনা আগবঢ়োৱা হ'ব ৷ উভয় পক্ষই প্ৰধানমন্ত্ৰী নৰেন্দ্ৰ মোদী আৰু ৰাষ্ট্ৰপতি ঝি জিনপিঙৰ মাজত হোৱা অনানুষ্ঠানিক শীৰ্ষ সন্মিলনৰ ফলাফল পৃথক পৃথক বিবৃতিযোগে ঘোষণা কৰিব ৷ প্ৰতিনিধি পৰ্যায়ৰ বৈঠকৰ পাচত দুয়োগৰাকী নেতাই মুখামুখি বৈঠকত বহিব ৷
এই বৈঠকত জনগণৰ পৰা জনগণলৈ সম্পৰ্ক,বাণিজ্যিক সম্পৰ্ক বৃদ্ধি, ভাৰত আৰু চীনৰ মাজত থকা 3500 কিলোমিটাৰ দৈৰ্ঘৰ সীমান্তত শান্তি আৰু বুজা-পৰা বৰ্তাই ৰখাৰ সন্দৰ্ভত সিদ্ধান্ত লোৱা হ'ব ৷
দুদিন পূৰ্বে পাকিস্তানৰ প্ৰধানমন্ত্ৰী ইমৰাণ খানৰ সৈতে বেইজিঙত বৈঠকত মিলিত হৈছিল চীনৰ ৰাষ্ট্ৰপতিগৰাকী ৷ পাকিস্তানৰ সৈতে হোৱা এই আলোচনাৰ পাচত দিয়া এক যৌথ বিবৃতিত চীনে কাশ্মীৰৰ বিষয়ৰ ওপৰত গভীৰ মনোযোগ দিয়া বুলি উল্লেখ কৰা হৈছিল ৷ লগতে ৰাষ্ট্ৰসংঘৰ চনদৰ ভিত্তিত বিষয়টোক উত্থাপন কৰি যথাযথ আৰু শান্তিপূৰ্ণভাৱে সমাধান কৰা উচিত বুলিও জনাইছিল ৷ ইয়াৰ ফলত ভাৰতৰ ফালৰ পৰা তীব্ৰ প্ৰতিক্ৰিয়াৰ সৃষ্টি হৈছিল ৷
উভয় পক্ষৰ বিষয়ববীয়াই জনোৱা মতে, এই শীৰ্ষ সন্মিলনত আলোচনা হ'বলগীয়া বহু বিষয়ত দুয়োখন দেশৰ মাজত তীব্ৰ পাৰ্থক্য থাকিলেও বুজা-পৰাৰে উন্নতিৰ বাটৰ সন্ধান কৰা হ'ব ৷
