নেশ্যনেল ডেস্ক, 6 আগষ্ট : বিজেপি নেতা তথা ৰেলৱে'ৰ ৰাজ্যিক মন্ত্ৰী মনোজ সিনহাক জম্মু-কাশ্মীৰৰ নতুন উপ-ৰাজ্যপাল হিচাপে নিযুক্ত কৰা হৈছে ৷ গিৰিশ চন্দ্ৰ মুৰ্মুৰ পদত্যাগ পত্ৰত ৰাষ্ট্ৰপতি ৰাম নাথ কোবিন্দে সন্মতি প্ৰদান কৰাৰ পাচতে মনোজ সিনহাক নিযুক্তি প্ৰদান কৰা হয় ৷
ৰাষ্ট্ৰপতি ভৱনে এক বিবৃতিত কয়, "জম্মু-কাশ্মীৰৰ নতুন উপ-ৰাজ্যপাল হিচাপে মনোজ সিনহাক নিযুক্তি দিয়া হৈছে ৷" উল্লেখ্য যে, জি. চি. মুৰ্মুয়ে বুধবাৰে এই পদৰ পৰা পদত্যাগ কৰিছিল ৷
জম্মু-কাশ্মীৰৰ পৰা অনুচ্ছেদ 370 বাতিলৰ জৰিয়তে বিশেষ ৰাজ্যৰ অধিকাৰ খৰ্ব কৰা এটা বছৰ সম্পূৰ্ণ হোৱা দিনটোতে মুৰ্মুয়ে পদত্যাগ ঘোষণা কৰে ৷ জম্মু-কাশ্মীৰক দুই কেন্দ্ৰীয় শাসিত অঞ্চলত বিভক্ত কৰাৰ পাচত 60 বৰ্ষীয় গুজৰাটৰ প্ৰাক্তন প্ৰশাসনিক বিষয়া মুৰ্মুক যোৱা বছৰৰ 29 অক্টোবৰত প্ৰথমগৰাকী উপ-ৰাজ্যপাল হিচাপে দায়িত্বভাৰ প্ৰদান কৰা হৈছিল ৷