নিউজ ডেস্ক, 17 ডেস্ক:ধৰাৰ বুকুলৈ শৰৎ নামিছে ৷ তাৰ লগে লগেই যেন ধৰাৰ বুকুলৈ নামি অহাৰ অপেক্ষা ওৰ পৰিল দুৰ্গতিনাশিনী দেৱীৰ ৷ দোলাত উঠি মৰ্তৰ বুকুলৈ নামি আহিল মহিষ মৰ্দিনী দেৱী দুৰ্গা ৷ আজি শুভ মহালয়া ৷ আৰম্ভ হ'ল দুৰ্গোৎসৱৰ লগ্ন ৷ দেৱী বন্দনাৰে মুখৰিত হৈ পৰিল মৰ্তৰ আকাশ-বতাহ ৷
আহিনৰ শুক্ল পক্ষৰ ষষ্ঠ দিন তথা ষষ্ঠীৰ পৰা আৰম্ভ হৈ দশমী পৰ্যন্ত দুৰ্গোৎসৱ অব্যাহত থাকে । এই পক্ষটোক দেৱীপক্ষ নামেৰে জনা যায়। পূৰ্বৱৰ্তী অমাৱস্যাৰ দিনা দেৱীপক্ষৰ সূচনা হয়, যাক মহালয়া বুলিও জনা হয়।
পুৰাণৰ মতে, অসুৰ শক্তিৰ ওচৰত পৰাভূত দেৱতাসকল স্বর্গলোকচ্যুত হোৱাৰ পিচত চাৰিওফালে আৰম্ভ হয় অশুভ শক্তিৰ ৰাজত্ব। এই অশুভ শক্তি বিনাশ কৰিবলৈ একত্রিত হোৱা দেৱতাগণৰ তেজৰশ্মিৰ পৰা আৱির্ভাৱ হয় অসুৰনাশিনী দেৱী দুর্গাৰ । মহালয়াৰ সময়ত থকা ঘোৰ অমাৱস্যা দুর্গা দেৱীৰ তেজোদ্বীপ্ত আলোকত দূৰ হয় । তাৰ পাচতেই প্রতিষ্ঠা লাভ কৰে শুভশক্তিয়ে ।