নিউজ ডেস্ক, 9 মাৰ্চ : ভাৰতীয় স্থলসেনাৰ এগৰাকী দক্ষ বিষয়া তথা ৰাজপুতানা ৰাইফলছৰ কামাণ্ডাৰ আৰু সেনাৰ ফিফটিন কোৰৰ প্ৰাক্তন জিঅচি লেফ. জেন. কেজেএছ ধিল্লনক প্ৰতিৰক্ষা চোৰাংচোৱা সংস্থাৰ গুৰুত্বপূৰ্ণ পদবীত নিযুক্ত কৰাৰ কথা প্ৰকাশ পাইছে ৷ সোমবাৰে প্ৰতিৰক্ষা বিভাগৰ শীৰ্ষ বিষয়াৰ উদ্ধৃতিৰে এই কথা প্ৰকাশ কৰিছে সংবাদ প্ৰতিষ্ঠান PTIএ ৷
1983 চনৰ ইণ্ডিয়ান মিলিটাৰী একাডেমীৰ পৰা স্নাতক লেফ. জেন. কেজেএছ ধিল্লনে নিজৰ দীঘলীয়া কাৰ্যক্ৰমত বহুকেইটা গুৰুত্বপূৰ্ণ অভিযানৰ নেতৃত্ব প্ৰদান কৰিছে ৷ ইয়াৰ ভিতৰত কাশ্মীৰস্থিত সেনাৰ ফিফটিন কোৰৰ দ্বাৰা পৰিচালিত 'Operation Maa', 'Taleem se Taraqqi' আৰু 'Humsaya hain hum' হৈছে অন্যতম ৷ ইয়াৰ উপৰিও তেখেতে জম্মু-কাশ্মীৰৰ মাতৃসকলক প্ৰায়েই তেওঁলোকৰ সন্তানসকলক সন্ত্ৰাসবাদৰ কৱলৰ পৰা আঁতৰত ৰাখিবলৈ অনুৰোধ জনাই আহিছে ৷ সেনাৰ ফিফটিন কোৰৰ দায়িত্বভাৰ গ্ৰহণ কৰাৰ পিচতেই তেখেতে বিগত বৰ্ষৰ ফেব্ৰুৱাৰী মাহৰ পুলৱামা আক্ৰমণৰ দৰে ঘটনাৰ সন্মুখীন হ'বলগীয়া হৈছিল ৷ শেহতীয়াকৈ তেওঁ ফিফটিন কোৰৰ পৰা অব্যাহতি লয় আৰু তেওঁৰ ঠাইত স্থলাভিষিক্ত হয় লেফ. জেন. বিএছ ৰাজু ৷ লেফ. জেন. ধিল্লনে বিশ্বাস কৰা ধৰনেই জম্মু-কাশ্মীৰৰ মাতৃসকলৰ আহ্বান শুনি 50ৰো অধিক স্থানীয় যুৱকে সন্ত্ৰাসবাদ বাদ দি মূলসূঁতিলৈ উভটি আহিছে ৷
প্ৰতিৰক্ষা বিভাগৰ শীৰ্ষ সূত্ৰৰ অনুসৰি, অতিকে প্ৰত্যাহ্বানমূলক বিগত বৰ্ষত লেফ. জেন.গৰাকীয়ে বহুকেইটা সফল অভিযানৰ নেতৃত্ব প্ৰদান কৰে ৷ সেয়েহে শেহতীয়াকৈ তেখেতক প্ৰতিৰক্ষা চোৰাংচোৱা সংস্থা (Defence Intelligence Agency, DIA)ৰ নিৰ্দেশক প্ৰধান (Director General, DG) আৰু সংহত প্ৰতিৰক্ষা সংস্থা (Integrated Defence Staff)ৰ উপ-প্ৰধান (Deputy Chief) নিযুক্তি দিয়াৰ সিদ্ধান্ত গ্ৰহণ কৰিছে মন্ত্ৰালয়ে ৷ ইতিমধ্যে তেখেতলৈ এই নিযুক্তি বিষয়ক এখন নিৰ্দেশপত্ৰ প্ৰেৰণ কৰা হৈছে আৰু তেখেতে শীঘ্ৰেই এই স্থানত দায়িত্বভাৰ গ্ৰহণ কৰিব ৷ এই নতুন দায়িত্বত তেখেতে যিকোনো সন্ত্ৰাসবাদমুলক ঘটনাক 100 ঘন্টাৰ ভিতৰত প্ৰত্যুত্তৰ দিয়াৰ লগতে, নিয়ন্ত্ৰণৰেখাত সংঘটিত হৈ থকা ঘটনাৰ প্ৰতিনিয়ত তদাৰক কৰিব ৷
প্ৰতিৰক্ষা চোৰাংচোৱা সংস্থা (Defence Intelligence Agency, DIA) হৈছে দেশৰ একমাত্ৰ চোৰাংচোৱা সংস্থা যিয়ে, সেনাৰ তিনিওটা অংগৰ মাজত প্ৰযুক্তিগত আৰু মানৱ সম্পদৰ ভিত্তিত তথ্যৰ সৰবৰাহ কৰাৰ লগতে অভিযানৰ নেতৃত্ব প্ৰদান কৰে ৷ 1999 চনৰ কাৰ্গিল আগ্ৰাসনত হোৱা ব্যৰ্থতাৰ পিচতেই 2002 চনত DIAক মন্ত্ৰীগোটৰ (Group of Ministers) নিৰ্দেশত গঠন কৰা হৈছিল ৷ শেহতীয়াকৈ ইয়াক নতুনকৈ গঠিত সৈন্য পৰিক্ৰমা বিভাগ (Department of Military Affairs)ৰ অধীনস্থ প্ৰতিৰক্ষা সংস্থা প্ৰধান (Chief of Defence Staff, CDS)ৰ অধীনলৈ লৈ অনা হৈছে ৷ ইয়াৰ উপৰিও এই সংস্থা হৈছে Multi Agency Centre (MAC)ৰ এক অংশ, যিয়ে বিভিন্ন সংস্থাসমূহৰ লগত একেলগে পাকিস্তান অধ্যুষিত কাশ্মীৰ আৰু পাকিস্তানৰ পৰা হোৱা সন্ত্ৰাসবাদীৰ আগ্ৰাসন প্ৰতিৰোধ কৰিবলৈ কাম কৰে ৷
