লক ডাউন : ভিডিঅ' কলৰ জৰিয়তে স্বামীৰ অন্ত্যেষ্টিক্ৰিয়াত অংশ ল'লে পত্নীয়ে

কৰ'ণা ভাইৰাছে সৰ্বাধিক গ্ৰাস কৰা ভাৰতৰ ৰাজ্য মহাৰাষ্ট্ৰত হৃদয় বিদাৰক ঘটনা ৷ লক ডাউনৰ বাবে এগৰাকী মহিলাই স্বামীক অন্তিম শ্ৰদ্ধাঞ্জলী জনালে ভিডিঅ' কলৰ জৰিয়তে ৷

নেশ্যনেল ডেস্ক, 19 এপ্ৰিল : কৰ'ণা ভাইৰাছ মহামাৰীয়ে সকলোৰে জীৱনলৈ সংশয় নমাই অনাৰ লগতে কিছুমান অঞ্চলত বহু হৃদয় বিদাৰক ঘটনা সংঘটিত হোৱাৰ তথ্য লাভ কৰা হৈছে ৷ ভাইৰাছে বিশ্বত বৰ্তমানলৈকে ডেৰ লাখৰো অধিক লোকৰ প্ৰাণ কাঢ়ি নিয়াৰ সমান্তৰালে ইয়াৰ ফলত ঘোষণা কৰা লক ডাউনৰ ফলতো সাধাৰণ লোকৰ জীৱনত বহু অন্তৰায় আহি পৰিছে ৷ মহাৰাষ্ট্ৰৰ সিধুদূৰ্গ জিলাতো পৰিলক্ষিত হল এক হৃদয় বিদাৰক দৃশ্য ৷

লক ডাউনৰ পৰিপ্ৰেক্ষিতত স্বামীৰ অন্ত্যেষ্টিক্ৰিয়াত ভিডিঅ' কলৰ জৰিয়তেই উপস্থিত থাকিবলৈ বাধ্য হ'ল এগৰাকী মহিলা ৷ 490 কিলমিটাৰ দুৰত্বত আয়োজিত স্বামীৰ অন্ত্যেষ্টিক্ৰিয়াত সোশৰীৰে উপস্থিত থাকিব নোৱাৰিলে মহিলাগৰাকীয়ে ৷

বৃহস্পতিবাৰে স্বামী চন্দ্ৰকান্তৰ মৃত্যু হোৱাৰ পাচতে দোদামাৰ্গ তহচিলৰ মোৰলে গাঁৱৰ বাসিন্দা বসন্তী বান্দেকাৰে লক ডাউনৰ বাবে স্বামীৰ মৃতদেহ নিজ চকুৰে প্ৰত্যক্ষ কৰাৰ সুবিধাও লাভ নকৰিলে ৷

বসন্তীৰ পুত্ৰ অমিতে এই সম্পৰ্কত কয়, "16 এপ্ৰিলত মুম্বাইত মোৰ দেউতাৰ মৃত্যু হয় ৷ লক ডাউনৰ ফলত তেওঁৰ মৃতদেহ গাঁৱলৈ নিবলৈ কোনো সুবিধা নথকাৰ লগতে মাকো মুম্বাইলৈ আনিব পৰা নগ'ল ৷"

দুখত ভাগি পৰা অমিতে সাংবাদিকক কয়, "সেয়েহে ভিডিঅ' কলৰ জৰিয়তেই মায়ে অন্তিম বাৰৰ বাবে দেউতাক চাবলৈ সক্ষম হোৱাৰ লগতে শ্ৰদ্ধাঞ্জলী জ্ঞাপন কৰে ৷"

উল্লেখ্য যে, মৃত চন্দ্ৰকান্তই পুত্ৰক সাক্ষাৎ কৰিবৰ বাবে মুম্বাইত উপস্থিত হৈছিল ৷ লক ডাউন ঘোষণা কৰাৰ এদিন পূৰ্বে মুম্বাইৰ এখন হাস্পতালত কেন্সাৰ ৰোগৰ বাবে তেওঁক চিকিৎসাধীন কৰা হৈছিল ৷

অমিতে কয়, "তেওঁ অসুস্থ অনুভৱ কৰা বাবে আমি তেওঁক হাস্পতাললৈ লৈ যাও আৰু জানিব পাৰো যে,তেওঁ কেন্সাৰ ৰোগত আক্ৰান্ত হৈছে ৷ মা যিহেতু গাঁৱত অকলে আছিল সেয়েহে আমি তেওঁক এই বিষয়ে জনোৱা নাছিলো ৷"

লগতে চাওকঃ ৩৩ শতাংশ কৰ্মচাৰীৰ দ্বাৰা কাম চলিব ৰাজ্যৰ চৰকাৰী কাৰ্যালয় সমূহত